Ni Imelda Castro-Rivero

Vigan City (24 May) -- Para kadagiti opisiales ti barangay napintas ti masakbayan dagiti annakda, wenno isuda a mismo gapu kadaytoy naimaldit iti Local Government Code a maited a libre a programa ti edukasion para kadakuada ken dagiti annakda. Numan pay bassit ti honorariumda, adda met daytoy a programa a pagsanggiranda.

Ginutugot ni Presidente Gloria Macapagal-Arroyo dagiti opisiales ti barangay diay Santa Mesa, Manila nga agbalinda kuma a computer-literate babaen ti programa ti gobierno tapno agbalinda a competitive iti panagbirokda ti pagsapulanda urayno addadan iti senior yearsdan. Innayun pay ti Presidente a ginutugot dagiti annak dagitoy nga opisiales ti barangay a mangsubok ti laderized education program babaen ti Technical Education and Skills Development Authority (TESDA). Ited daytoy ti insigida a pannakausar ti skillsda para ti practical livelihood, ket kasta met a maicredit ti TESDA unitsda iti panagkolehioda.

Adda pay ti caregiving wenno physical therapy course ti TESDA a mausar kas foundation subjects iti Nursing no agkolehioda. Kas inripirip ti Presidente, kasapulan nga aghuego ti skills ken edukasion iti trabaho a maaplayan. Adu dagiti trabaho, kinunana, ngem saan met a masungbatan ti skills a kasapulan kadagitoy a trabaho. Isu a kasapulan ti panagsanay babaen ti TESDA.

Iti met Ilocos Sur, segun ti provincial office ti Department of the Interior and Local Government (DILG) nabayagen nga adun dagiti annak dagiti opisiales ti barangay ti mangus-usar ti naited a pribilehioda. Idadaulluan itan ni Officer-In-Charge Godofredo Martinez ti DILG Ilocos Sur (iyawatmi ti panakipagladingit iti pamilia ni DILG Provincial Director Rodolfo Viloria, maysa a naanus a director. May God keep you in His love, Sir Rody).

Agad-adal dagitoy nga annak dagiti opisiales ken dagiti lideres iti Sanguniang Kabataan (SK) diay University of Northern Philippines (UNP) iti ciudad ti Vigan ken Ilocos Sur Community College (ISCC) iti ili ti Bantay. Kasta met kadagiti SK Chairmen. Segun iti DILG adda ngamin age limit ket dagitoy ti mabalin nga agadal kadagitoy a kurso ta saan met a mabalinen dagiti senior citizens nga opisiales.