Cebuano News: Mga ginikanan gipahinumdom sa dakong buluhaton sa pag-umol sa ilang mga anak
by Flor Jackson
Naval, Biliran (25 May) -- "Ang mga ginikanan aduna'y dakong buluhaton sa pag-umol sa ilang mga anak," matod pa sa presentation nga gihimo ni Engr. Leonardo Madeja sa Technical Working Group (TWG) sa Youth and Family Life program durante sa gihimo nga strategic planning sa youth sector nga gipasiugdahan sa GTZ o kon German Technical Cooperation pinaagi kang Dr. Ferdinand Fernando ang GTZ Expert ug sa DSWD sa probinsya sa Biliran pinaagi kang Flordeliza Trani.
Nahibaw-an sa maong katigom nga giapilan sa mokabat ug 15 ka mga batan-on nga miyembro sa nagkalainlaing youth groups dinhi sa probinsya sa Biliran ug sa lungsod sa Naval, nga ang hinungdan sa mga batan-on nga mahisalaag sa maayong dalan sa kinabuhi ug mahisugamak sa mga dautang buhat sama sa drugs, sex ug uban pang mga bisyo mao ang pagkawalay panahon nga gigahin sa mga ginikanan sa pagtudlo ug pag-agak sa ilang mga anak sa maayong mga values ug kinaiyahan.
Giklaro pa sa mga batan-on nga ang mga ginikanan dili kaayo mo- communicate o makig-estorya sa ilang mga anak sanglit ang mga anak usab mauwaw mopagawas sa ilang problema ngadto sa ilang mga ginikanan.
Dugang pa ni Engr. Madeja nga gikinahanglan gihapon nga abli ang komunikasyon tali sa mga anak ug sa mga ginikanan aron malikayan ang mga problema sa atong mga kabatan-onan.
Kasumpay niini, gipahamatang ni Engr. Madeja nga sayop sa mga ginikanan ang dili maghisgut sa ilang mga anak nga dili mag hinabi bahin sa sex tungod kay kini maoy hinungdan nga daghan sa mga kabatan-onan karon ang mag minyo ug mag anak nga bata pa kaayo tungod kay kuwang ang paghisgot-hisgot sa mga ginikanan mahitungod niini nga mga butang ngadto sa mga anak. (PIA) [top]
