Ni Rebecca Cadavos

Southern Leyte (29 May) -- Ang administrasyon motutok sa pagkompleto sa mga proyekto nga gitawag ug super regions sa nahibilin nga tulo ka tuig nga termino ni Presidente Gloria Macapagal-Arroyo sa dili pa mopuli ang mga bag-o.

Usa ka inpormante sa Malacanang nag-ingon nga ang Presidente dili mohimo ug dugang inprastraktura nga proyekto apan hinoon gusto nga ang iyang kabinete molihok sa pagkompleto sa gihimo nga super regions, diin siya nagtumong nga ibilin isip legasiya sa iyang adminstrasyon.

Si Economic Planning Secretary Romulo Neri nag-ingon nga ang Presidente nagmando na sa nagkadaiyang mga ahensya sa gobyerno sa paghimo sa mga proyekto ubos sa Medium Term Public Investment Plan.

“Aduna na kita’y daghan nga proyekto nga nahan-ay na. Ang Presidente gusto nga makasiguro nga ang nag-implementar nga mga ahensya makahuman sa dili matapos ang iyang termino sa 2010,” matud pa ni Neri.

Ang mga proyekto sa inprastraktura ubos sa super regions nga konsepto, siya nagklaro sa Kongreso atol sa iyang State-of-the-Nation Address niadtong Hulyo 2006.

Ubos sa gisugyot nga super regions, ang gobyerno nagsugyot paghimo ug agribusiness quadrangle sa North Luzon ug industrial beltway sa Metro Luzon. Nagsugyot usab sa pag-usab sa Kabisayaan ngadto sa usa ka lugar alang sa panerbisyo ug turismo, samtang maghimo sa Mindanao nga usa ka basket puno sa pagkaon sa tibuok nasud.

Si economic advisor Joey Salceda nagdala sa gikinahanglan nga kapital sa mga super regions nga proyekto sa kantidad nga P372.02 bilyones. Ang P181.15 bilyones niini gamiton sa paghimo ug railways, samtang laing P101.8 bilyones gamiton alang sa pundo paghimo ug bag-ong mga dalan ug ubang mga tag-as nga dalan kon highways. Laing P43.1 bilyones gigahin sa pag-ugmad sa mga airports samtang ang nahibilin nga P15.85 bilyones gigahin alang sa paghimo ug pagpalambo sa mga seaports.

Duolan sa tunga sa gikinahanglan nga pundo o sulod sa P186.27 bilyones i-padagan sa nasyonal nga pangagamhanan o gikan sa mga overseas development assistance.