Cebuano News: Gobyerno sa Australia mo-donate ug mga gamit militar
By Lanie Pitao-Tupaz
Manila (31 May) -- Ang gobyerno sa Australia misaad pagdonar ug 28 ka mga sakyanang pangdagat sa Philippine Army isip kabahin sa defense cooperation program tali sa duha ka nasud nga maayo na ang relasyon sukad pa sa tuig 1950.
Sumala pa ni Defense Undersecretary Ricardo Blancaflor, ang Australia miawhag ug A$4 milyones nga kantidad sa training grants sa mga Pilipinong sundalo.
Si Blancaflor malaomon nga si Presidente Gloria Arroyo molagda sa Status of Forces Agreement (SOFA) nga katumbas sa Visiting Forces Agreement (VFA) tali sa Pilipinas ug Estados Unidos sa iyang duha ka adlaw nga pagbisita sa Ausralia aron mapalambo ang defense cooperation program sa duha ka mga nasud.
Sa nahiuna, si Australian Ambassador sa Manila nga si Tony Hely miingon atol sa briefing uban sa mga reporters nga andam na ang mga nakasaad sa SOFA.
Sumala pa ni Hely, ang RP-Australia SOFA maghatag lamang ug mga basihan sa pagsulod sa mga sundalong Australyano nganhi sa Pilipinas ug sa mga Pilipinong sundalo ngadto sa Australia aron pagbansay ug pagpalambo sa kapasidad sa armadong kusog sa duha ka nasud sama sa gibuhat sa mga Amerikanong militar sa VFA.
Si Hely miingon nga wala magtuyo ang SOFA sa pagbutang ug base militar sa nasud apan kini mopalambo lamang sa programa sa pagbansay nga gihatag nang daan sa Australia ngadto sa Armed Forces of the Philippines.
Si Blancaflor miingon nga ang Pilipinas nagtinguha paglagda ug samang kasabotan sa mga nasud sa Asya sama sa Brunei, Singapore, ug Malaysia.
Si Presidente Arroyo mibiya sa nasud niadtong Domingo alang sa lima ka adlaw nga pagbisita sa New Zealand ug Australia aron mapalambo ang ralasyon sa bilateral trade, ug ekonomiya sa duha ka nasud. (PIA BIliran) [top]
