By Lanie Pitao-Tupaz

Manila (31 May) -- Ang mga billboards ug posters nga nag-advertise sa mga sigarilyo idili na sa nasud Pilipinas sugod sa buwan sa Hulyo diin ang mga malapason mag-atubang sa silot nga pagkapriso, bahad pa sa Department of Health.

Ang gobyerno midesider na pagpasunod sa maong balaod nga unang gipasa niadtong 2003, matod pa ni Ernie Vera sa National Tobacco Prevention and Control Program sa DOH.

Ang tanan advertisements sa mga sinihan ug sa gawas, leaflets ug posters kinahanglan tanggalon na sa Hulyo 1. Ang print ads ug posters itugot lamang dinha sa mga tindahan nga nagbaligya ug sigarilyo apan ang mga print ads idili na usab sa Hulyo 8 sa sunod tuig, miingon si Vera.

Ang Pilipinas usa lamang sa pipila ka mga nasud nga mitugot sa dinaghan nga billboards sa sigarilyo.

Ubos sa balaod, ang balaod nagtanggal sa advertisements sa sigarilyo. Ang radio ug TV ads gidili na niadtong miaging Enero, sunod niini ang mga billboards.

Ang mga establismento nga dili mananggal sa ilang mga billboards pagamultahan sa kantidad nga P100,000 ($2,163) ug ang ilang mga opisyales mag-atubang sa kaprisohan nga moabot sa usa ka tuig. Taas-taas nga multa ug dugay-dugay nga pagkapriso ang ipataw kung mopadayon ang mga malapason.

Si Vera miingon nga giobliga na ang pagdili sa mga advertisements tungod sa nagtikadaghan nga mga kaso sa sakit nga may kalabotan ang sigarilyo. Ang gobyerno mibana-bana sa 20,000 ka mga kamatayon nga may kalabotan sa sigarilyo matag tuig.