by Rey Anthony Chiu

Tagbilaran City (6 June) -- SA desisyon sa Korte Suprema pagpalingkawas sa Batasan 5 sa kasong kriminal batok kanila, mibutyag ang Buhatan sa Solicitor General pinaagi ni Sol. Gen. Agnes Devanadera nga ipasaka sa kagamhanan ang usa ka Motion for Reconsideration.

Ang mosyon magresolba una sa isyu sa determination of probable cause kon tukma ba ang hunahuna sa Secretary of Justice nga may political nga konsiderasyon ang mga sumbong.

Kahinumduman nga gitawag og Batasan 5 sila si Crispin Beltran, Liza Masa, Joel Virador, Saturnino Ocampo, Teodoro Casino ug Rafael Mariano, mga sakop sa Kongreso.

Gipagawas ang arrest warrants sa lima, apan inay desisyonan sa ubos nga korte ang apelasyon nga gisaka sa mga natungdan, didto isang-at ang kaso sa Korte Suprema, kinsa mipagawas usab sa iyang desisyon.

Subay sa mga taho, mituo ang Buhatan sa Solicitor General nga ang pagtimbang sa probable cause bulohaton sa Prosekosyon. Kon ang usa sa mga partidos, wala matagbaw sa desisyon, ang tukmang lakang mao ang pagsaka og petisyon ngadto sa Prosekosyon kinsa maoy tighukom sa mga ebidensya.

Ang mga trial courts lang ang may katungod nga ilhon ang probable cause alang sa pagpagawas sa warrants of arrests subay sa ebidensya nga gisumitir.

Usa ka gitahud nga legal nga prinsipyo mao nga ang Korte Supreme dili motimbang sa ebidensya. Dugang ni Devanadera, ang mga Prosecutor mitimbang na sa ebidensya bisan pa sa mga hunahuna ug legal nga opinion sa Secretary of Justice.

Sumpay sa SolGen, buot nilang itaas ang mosyon kay kini usa ka kaso nga mahimong tandi-an alang sa sistemang kriminal justice sa nasud.

Sa kapid-an ka mga kasong natanggong sa unang lakang sa prosekosyon, angay ba nga ang Korte Suprema ang magtimbang sa ebidensya? pangutana sa Buhatan sa Solicitor General.