Ni Fred Dellava

Manila (6 June) -- Si Press Secretary ug Presidential Spokesman Ignacio Bunye nagkanayon nga usa sa pamaagi aron makalingkawas ang nasud gikan sa kapit-os sa kinabuhi mao ang paghatag og de-kalidad nga edukasyon ngadto sa mga Pilipinhong estudyante.

Matud ni Bunye ang pag-angkon sa de-kalidad nga edukasyon maghupot sa yawe aron pagpukan sa kapobrehon, rason nga ang administrasyon nagpadayon sa pagpatukod og mga bag-ong tulunghaan, pag-hire og daghang mga magtutudlo, ug pagpatahom sa basic curriculum isip parte sa social payback sa Pangulo.

Sumala niya ang panggamhanan ni Presidente Gloria Macapagal Arroyo mitugyan og prayoridad ngadto sa probisyon sa de-kalidad ug barato nga edukasyon isip usa ka mahinungdanong parte sa pakigbisog batok kapobrehon.

“Atong tugutan ang mga Pilipinhong kabataan nga makatungha sa eskwelahan isip kabahin sa atong non-partisan agenda, inay nga pasagdan sila nga maglatagaw sa mga kalsada kun sa mga kam-anan, sa mga iligal nga establisyemento ug sa ubang mga makuyaw nga lugar sa trabaho kung asa dili unta angay silang mahimutang,” dugang niya.

Ang pahayag ni Bunye minggula human sa assessment sa Department of Education (DepEd) nga ang pag-abli sa klase karong tuiga “hapsay ug malinawon”.