By Lanie Pitao-Tupaz

Manila (13 June) -- Atol sa ika-109 nga kasaulogn sa Independence Day, si Presidente Gloria Macapagal-Arroyo misubli sa iyang panawagan sa panaghiusa ug miawhag sa mga lideres pagpadaplin sa pulitika ug unahon ang interest sa katawhan.

Pagkatapos sa flag-raising ug wreath-laying ceremonies, si Presidente miingon nga obligasyon natong tanan sa atong mga katigulangan kinsa mibuhis sa ilang mga dugo alang sa atong kagawasan nga kita maghiusa ug maningkamot aron mahatagan sa maayong kinabuhi ang matag Filipino.

Kung nakigbisog man ang atong mga katigulangan alang sa atong kagawasan, angay lamang usab kitang makigbisog aron masalbar sa kakabus ang atong mga lumulupyo.

Ang katawhan nagtinguha ug estabilisayon sa pulitika ug mga reporma sa ekonomiya. Kini gilaoman nga atong ipadayon ang dalan nga maghatag ug prayoridad sa katawhan imbis ang pulitika, dugang pa ni Presidente.

Si Presidente nanawagan sa panaghiusa sa iyang pagsulti atol sa pagtapos sa 13th Congress niadtong miaging Huwebes diin siya miawhag sa iyang mga kaalyado ug kakontra sa pulitika sa pag-uswag gikan sa gipanagbangiang eleksyon sa Mayo.

Siya miingon nga mas makahulogan ang selebrasyon karon sa Independence Day kung mopakita ang matag usa sa ilang pagkabayani sa pag-atubang sa mga hagit nga giatubang sa nasud karon.

Ang pagpalambo ug pagpauswag sa ekonomiya maoy yawe sa kagawasan sa katawhan gikan sa kakabus, matod pa ni Presidente.

Si Presidente miingon nga ang iyang administrasyon mas nakatotok sa mga estratehiya nga pro-growth, pro-trade, ug pro-investment nga makatabang pagtubag sa problema sa kakabus sa daghang Filipino.

Siya mihingalan sa pag-uswag sa ekonomiya, mas balanse nga budget, ug pinakaimportante, ang mga galastohan sa serbisyo publiko ug ang pagpataas sa suweldo sa mga empleyado sa gobyerno.

Si Presidente mitapos sa iyang pamahayag sa usa ka pangadye alang sa tanan ilabi na niadtong mga nanginahanglan.

Ang tema sa kasaulogan karon nag-ingon: “Sama-sama sa pagpupunyagi at pagdiriwang”.

Si Tourism Secretary Joseph “Ace” Durano miingon nga ang selebrasyon niini nga tuig naatol sa panahon tungod kay gipahigayon kini pagkatapos sa pagkatibulaag sa miaging eleksyon sa Mayo.

Kini maayo nga paagi aron pag-usab sa giya, matod pa ni Durano ngadto sa mga reporters.