Cebuano News: Jala, Uy nanawaga'g imbestigasyon sa pasangil sa 'suborno ni Pimentel'
Tagbilaran City (15 June) -- BUOT ni Bohol Representative Eladio Jala nga imbestigahan sa Commission on Elections (COMELEC) ang pasangil sa usa ka Election Supervisor nga gitanyagan siya og salapi ni Senatorial candidate Aquilino "Koko" Pimentel aron padag-on kini sa South Cotabato.
Si Jala gidasonan usab ni Isabela Representative Edwin Uy, sa Lakas CMD.
Si Pimentel, kandidato alang sa Senado sa Genuine Opposition.
Segun sa taho, gitanyagan ni Pimentel is Lilian Radam, poll supervisor sa South Cotabato sa suborno aron himoon ang katuyuan nga padag-on si Pimentel didto.
Matud ni Jala ug Uy, seryoso ang pahayag sa supervisor ug kini angayan lang imbestigahan.
Dugang sa duha, ila na nga gitambagan si Koko, anak ni Senador Aquilino Pimentel nga mopailawom sa iyang kaugalingon sa imbestigasyon, ug dili lang magtagawtaw sa media.
Butyag ni Jala sa mga taho nga ang pagsuway sa staff ni Pimentel nga magpatabang sa supervisor human itanyag ang suborno, seryoso nga alegasyon ug angayan na nga tukion sa Comelec.
Si Jala mipalubad nga bisan pa sa gipagawas nga paghimakak ni Pimentel, dili angay nga bali-wala-on kini sa Comelec ilabi na nga may gibuhian pahayag si Radam nga andam kining mobatbat sa mga detalye sa pagsuway's suborno sa kampo ni Pimentel.
Mituo si Boy Jala nga matumbok ni Radam ang mga tawong apil sa pagsuway kon may imbestigasyon.
Sa laing bahin, isip poll supervisor, responsibilidad ni Radam ang pagtaho sa anomalya sa iyang lugar ug dili lang aron baslan si Pimentel sa iyang kasong nga election sabotage batok kang Radam. (PIA Bohol) [top]
