Cebuano News: Dugang pundo sa edukasyon, imprastruktura ug panglawas gimando ni PGMA
By Erna Sy Gorne
Manila (18 June) -- Ang pag-ambak sa budget sa edukasyon at imprastruktura dili lamang mohunong karong tuiga. "Sa sunod tuig, gusto pang pun-an (matud pa ni Presidente Gloria Macapagal-Arroyo) ug Php 24 bilyones ang imprastruktura, mga Php 8 bilyones alang sa edukasyon ug Php 3 bilyones alang sa panglawas," matud pa ni Budget Secretary Rolando Andaya, Jr. atoll sa "The Cabinet Speaks" TV program nga gipasundayag Channel 4 kaniadtong Biernes.
Atol sa maong talk show, diin kini gipangunahan ni Press Undersecretary Isabel C. de Leon, gitumbok ni Andaya nga tungod kay “maayo ang atong ekonomiya, maayo ang atong pagkolekta, nakabaton ug kahigayonan ang atong mahal nga Presidente sa pagpili ug mga hut-ong sa katilingban nga hatagan ug pagtagad, hatagan ug mas daku nga pundo…”
Dugang pasabot ni Secretary Andaya, gusto ni Presidente Gloria Macapgal-Arroyo ang mas daku nga pundo alang sa edukasyon, imprastruktura ug panglawas alang sa 2008 nga nasyonal na budyet diin kini gipangandaman na sa Department of Budget and Management (DBM).
Ang dugang Php 8 bilyones alang sa edukasyon magsiguro nga “makaapas ang atong hut-ong sa edukasyon sa atong mga magtutudlo, mga lawak klasehanan ug mga materyales sa pagtudlo,” matud pa ni Andaya, kinsa mipadayag nga ang budyet alang sa pagkuha ug dugang 12,000 ka mga magtutudlo alang ning tuiga nahatagan na ug pagtugot ug laing 10,000 ka mga magtutudlo ang pagakuhaon sunod tuig. (PIA Southern Leyte) [top]
