by Rey Anthony Chiu

Tagbilaran City (20 June) -- GI-SERTIPIKAHAN ni Presidente Gloria Macapagal Arroyo isip dinalian ang balaodnon nga nangayo og laing napulo pa ka tuig nga extension sa Comprehensive Agrarian Reform Law, atul sa ika 19 ka tuig nga anibersaryo sa CARL didto sa Malakanyang.

Ang CARL, o Republic Act (RA) 6657 nga mibukas niadtong 1988 motak-op na sa sunod nga tuig.

Kon ma-aksyonan ang balaodnon, molanat na usab ngadto sa 2018 ang programa sa CARP, igo nga panahon aron ikapadayon sa Department of Agrarian Reform ang programa niini sa pagpang-apud-apod sa mga kayutaan ngadto sa mga mag-uuma nga walay yutang gitikad.

Si Agrarian Reform Secretary Nasser Pangandaman mibutyag nga ang desisyon sa Presidente sa pagduso sa balaodnon magtugot usab sa kagamhanan sa pagtibawas sa nahibilin nga dos milyones ektaryas nga yuta nga wala pa mapailawom sa CARP.

Gilantaw usa niini nga dos milyones usab ka mga-uuma ang makapahimulos niini.

Sa pag-implementar sa programa, kapin sa pito ka milyon ka ektarya na ang napaubos sa CARP sukad sa 1988, ug kapid-an na la mag-uuma ang nakapahimulos niini.

Sa suporta sa CARP, kapin sa 500 mil ka trabaho na ang napasugdan sa imprastraktura, dugang ni Pangandaman.

Tumong sa CARP nga buhion ang mga pamilya sa mga mag-uuma nga nagsalig sa bukid pinaagi sa pagtukod og mga kahigayunan sa matunhayong kalinaw ug kalambuan sa kabarangayan.