Cebuano News: Nahibiling 3 tuig sa Arroyo administration gigahin para legacy
by Flor Jackson
Manila (June 23) -- Ang sunod nga tulo ka tuig sa administrasyon ni Presidente Gloria Macapagal-Arroyo igahin sa paghimo ug mga handumanan. Ang iyang administrasyon mao’y usa ka panggobyernohan nga motumbok sa ekonomiya diin ang mga tawo makaambit sa benepisyo sa gi-implementar nga reporma.
Ang pag tumbok sa administrasyon ngadto sa ekonomiya nagdala niini ngadto sa 6.9 por syento nga pagtubo diha sa first quarter uban na ang dili na mapugngan nga pag-usbaw sa lokal ug foreign investments, maayo nga performance sa stock market, lig-on nga peso ug pagkubos sa ihap sa walay trabaho. Ang ekonomiya nakaabot na sa bag-o nga level sa paghingkod ug stabilidad ug kini nasaksihan pinaagi sa pinaka malig-on nga macroeconomics fundamentals suod sa napulo ka tuig.
Sa pag kompleto sa unang hut-ong sa ilang turnaround plan, ang gobyerno sa pagkakaron aduna na’y economic momentum, kalig-on sa panalapi ug international confidence aron ma-implementar sa dugay nang nalangan nga human ug physical infrastructure projects nga magbali ug magsumpo sa kapobrehan aron mabati ug matagamtaman sa mga tawo ang mga benepisyo sa pag-usbaw sa ekonomiya.
Ang administrasyon komitido sa unhanan nga pakigtambayayongay, pagmantener sa dagan sa ekonomiya, pagpadayon sa kinatibuk-ang tumbok sa ekonomiya ug kini dili matandog sa hagit sa politika aron lamang makab-ot ang maong handumanan.
Ang pagtabang sa media ug ang ilang suporta gikinahanglan aron matabangan ang gobyerno ug ang mga tawo nga makab-ot ang bag-ong dagway sa pag-usbaw, kalig-on ug reporma pinaagi sa balanse nga pag report sa mga balita nga pinasikad sa verified facts, komentaryo nga maayo bahin sa mga issues ug editorial nga nahatumbok sa mga balita nga adunay kalabutan sa kinabuhi ug sa mga panginabuhi sa ordinaryo nga mga Filipino. (PIA-Biliran) [top]