MANILA (27 June) -- Mainiton nga gidawat sa Malacanang ang sugyot ni Supreme Court Chief Justice Reynato Puno labot sa pagpahigayon og usa ka halapad nga tigom sa sunod bulan nga magtuki sa isyu sa extra-judicial killings nga mga panghitabo sa nasud.

Si Press Secretary ug Presidential Spokesperson Ignacio Bunye mitataw nga ang administrasyon karon ni Pangulong Arroyo nagbaton og klaro kaayo nga kamandoan pagsaway sa naasoy nga mga pang-hitabo.

"Subay sa palisiya ni Pangulong Arroyo gipaluyohan nato ang panawagan sa Chief Justice labot sa pag-pasiugda og multisectoral summit aron masuta unsay papel nga paga-kubtan sa mga Hukmanan taliwa ning maong pag-pamatay," nagkanayon si Kalihim Bunye.

Sa samang higayon, gipasaligan usab ni Sec. Bunye ang katawhan sa padayong paningkamot sa administrayon aron matugkad ug masulbad kining tanan.

Kahinumdoman nga sa Agosto sa miaging tuig si Presidente Gloria Macapagal Arroyo nagmugna og usa ka Komisyon nga dunay lima ka sakop aron maoy mo-imbestiga sa nahisgutang mga panghitabo ug ingon man moduso og rekomendasyon sa unsay angay buhaton.

Sayo karong tuiga gimugna usab sa Pangulo ang Melo Commission diin gi-rekomenda niini ang pagbutang og mga special courts kansang tahas mao ra gyod ang pag-atiman sa mga kaso sa extra-judicial killings, ingon man paglig-on sa Witness Protection Program.

Nanawagan usab ang Pangulo sa mga kabanay sa mga biktima sa pagbarug batok sa mga gidudahan aron modis-og, mo-aginod sa unahan ang mga kaso.