Cebuano News: PGMA mogahin og P5-B alang sa bag-ong mga helikopter sa PAF
Ni Fred Dellava
General Santos City (5 July) -- Ang nasudnong gobyerno mogahin og 5 bilyones pisos ngadto sa Philippine Air Force (PAF) alang sa pagpalit og bag-ong mga helikopter isip hulip sa mga karaang gamit nga nahimong hinungdan sa nakalabayng pipila ka mga aksidente.
Ang bag-ong lakang karon sa gobyerno kabahin sa implementasyon sa naunang bahin sa modernization program alang sa Philippine Air Force.
Luyo niini, gimandoan ni Pangulong Gloria Macapagal-Arroyo silang AFP Chief of Staff Hermogenes Esperon ug PAF Chief Lt. Gen. Horacio Tolentino nga mohimo gilayon og mga pamaagi aron maka-angkon og bag-ong mga helicopter.
Sa iyang mensahe atul sa kasumaran sa ika-60 nga anibersaryo sa Philippine Air Force sa Villamor Air Base kagahapon, ang Pangulo nagkanayon nga ang pondo nga gamiton sa pagpalit og mga bag-ong kahimanan sa PAF, kabahin sa mokabat 17.5 bilyones pisos nga kinatibuk-ang pondo alang sa programang modernisasyon sa administrasyon ngadto sa PAF sulod sa duha ka tuig.
Dugang niini, ang panggamhanan naglaom nga ang mga personahe sa Philippine Air Force mahimong maisugon, ingon man luwas gikan sa disgrasya pinaagi niining mga bag-ong helikopter. (PIA-SarGen) [top]
