Ni Rebecca Cadavos

Southern Leyte (10 July) -- Nagtuo nga ang kahibalo mao ang kinadak-an nga tighimo sa katigayonan sa kalibotanong ekonomiya karon, si Presidente Gloria Macapagal-Arroyo misaad sa pagpalambo ug pagmoderno sa sistema sa edukasyon sa nasud sa dili pa mahuman ang iyang termino sa 2010.

Sa iyang mensahe sa wala pa magsugod ang diskusyon didto sa Malakanyang kagahapon diin magtutuk sa edukasyon alang sa pagkompetensya, produksyon ug paghaw-as sa kalisod, ang Presidente nagpahayag nga ang gobyerno nagpataas sa pundo alang sa edukasyon sa kantidad nga P150 bilyones karong tuiga gikan sa P129 bilyones sa tuig 2006 aron sa pagmoderno sa sistema sa edukasyon.

“Mga, kababayan, sa umaabot nga State-of-the-Nation Address (SONA) karong Hulyo 23 ug sa mosunod nga tulo ka tuig, usa ka butang ang pagatutukan, ang pagpapatigayon. Paghatag ug puhunan dili lamang sa pagnegosyo ug inprastraktura kon dili paghatag ug puhunan sa katawhan aron mas makabenipisyo sa pagkamaayo sa ekonomiya,” matud pa sa Presidente.

Ang Presidente nagtahu nga sa tuig 2006, ang iyang administrasyon naghimo ug 15,000 ka classrooms ug nag-implementar ug duha kabahin kada adlaw sa ratio nga 50 ka estudyante sa grade school kada lawak, walay labot sa ubang magubot nga lugar.

Sukad sa 2001, ang gobyerno nangempleyo sa 40,000 ka magtutudlo ug nagbansaybansay ug 200,000. Sa tuig 2004, and DepEd nagsugod usab sa rehiyonal nga payroll system diin nagproseso sa mga sweldo ug retirement pays sulod sa 30 ka adlaw.

Ang gobyerno, matud pa sa Chief Executive, nag-angkon usab ug 120 milyones nga libro ug manual sa mga magtutudlo ug nakahatag ug usa ka libro matag estudyante sa grade school alang sa English, Filipino, Science, Mathematics ug Social Studies nga mga subjects.