Cebuano News: 27 nasud motambong sa 40th ASEAN Ministerial Meeting karong Hulyo 29
Ni Fred Dellava
Manila (16 July) -- Adunay kinatibuk-ang 27 ka mga kanasuran ang mo-presenta sa umaabot nga ika-40 nga ASEAN Ministerial Meeting (AMM), Post Ministerial Conferences (PMCs), ug ika-14 nga ASEAN Regular Forum (ARF) nga ipahigayon sa Philippine International Convention Center sa Dakbayan sa Pasay sugod Hulyo 29 ngadto Agosto 2.
Matud ni DFA Assistant Secretary for ASEAN Affairs Luis Cruz ang ASEAN foreign ministers gilauman nga mo-hisgut sa kahimtang sa mga paningkamot sa komunidad sa ASEAN aron palapdan pa ang implementasyon sa tulo ka haligi niini-kalabot sa security community, economic community, ug socio-cultural community.
Sumala ni Cruz nga sapupohon usab sa ika-40 nga AMM, ang mga lakang nga mo-implementar sa landmark decisions sa 12th ASEAN, 2nd East Asia Summit ug uban pang summits nga gipahigayon ilawom sa pagpanguna ni Pangulong Gloria Macapagal-Arroyo.
Ang Pilipinas, isip kasamtangang chairman sa ASEAN Standing Committee, gilauman nga mangulo sa paglantugi unya sa mga direktiba sa mga lideres sa ASEAN.
Ang AMM usa ka tinuig nga panagpulong sa mga lideres sa ASEAN diin ginapahigayon matag Hulyo.
Sa tema nga "One Caring and Sharing Community," naglaom ang gobyerno nga makab-ot ang tukmang kalamboan pinaagi sa kalamposan niining panagtigom sa mga lideres sa habagatan-silangang Asya ingon man usab ang kooperasyon sa matag miyembrong nasud. (PIA-SarGen) [top]
