Cebuano News: "Task Force AMM" gimugna alang sa seguridad sa 40th ASEAN Ministerial Meeting
Ni Fred Dellava
General Santos City (17 July) -- Gimugna karon sa Nasudnong Pulisya sa Pilipinas (PNP) ang "Task Force AMM" aron masiguro ang seguridad sa umaabot nga ika-40 nga ASEAN Ministerial Meeting ug lain pang related meetings sa kaulohan sugod 29 sa Hulyo.
Ang "Task Force AMM" nga pangulohan ni PNP Deputy Director General Avelino Razon mobantay sa tanang mga gitudlong lugar sa pulong, apil na ang mga hotel kung asa ipahimutang ang mga delegado.
Matud kang PNP Director General Oscar Calderon, ginasiguro sa pulisya ang seguridad gumikan ang bisan unsa mang makuyaw sa kinabuhi sa mga delegado maka-apekto sa nasudnon ug bilateral interes sa nasud ug participating ASEAN ug dialogue countries.
Ang 40th AMM, Post Ministerial Conferences, ug ang 14th ASEAN Regional Forum pagaluwatan sugod Hulyo 29 ngadto Agosto 2 sa Philippine International Convention Center (PICC), dakbayan sa Pasay.
Si Calderon nagkanayon nga ang PNP andam sa pagpugong sa unsa mang lokal ug langyawng mga elemento nga mosamuk-samok sa nahisgutang panagpulong.
Mas hugtanon matud pa ang ilang mga pagpangandam karon sama usab sa nakalabayng 12th ASEAN Summit sa Cebu niadtong Enero.
Kahibaloan, nga taliwala sa mga hulga sa seguridad, ang Cebu Summit ug related meetings nagpadayon nga walay mga kakulian. (PIA SarGen) [top]
