Cebuano News: PNP mopahigayon og dry-runs kalabot sa pagpangandam sa seguridad sa CCP Complex
Ni Fred Dellava
General Santos City (17 July) -- Mopahigayon og dry-runs ang Nasudnong Pulisya sa Pilipinas (PNP) kalabot sa pagpangandam sa seguridad sa CCP Complex diin pagaluwatan ang ika-40 nga ASEAN Ministerial Meeting ug lain pang related meetings.
Matud sa Pulisya hugtanon ang seguridad, vehicular ug pedestrian traffic sa tibuok bahin sa Cultural Center of the Philippines (CCP) Complex kung asa nahimutang ang PICC ug ang Hotel Sofitel.
Nauna nang gibutyag ni PNP Director General Oscar Calderon nga ang PNP, sa pakig-alayon sa Department of Foreign Affairs, Department of Health, ug uban pang security agencies, dili lamang motugyan og seguridad apan motubag usab sa unsa mang emerhensiya aron mamahimong alibyo ang dagan sa naasoyng panagpulong.
Kabag-uhay lamang, si Chief Superintendent Romeo Hilomen, hepe sa PNP Police Security and Protection Office, nagkanayon nga ang iyang mga tinawo motugyan usab og hugtanong seguridad ngadto sa langyawng mga ministro ug sa ilang mga asawa atul sa ilang pagpuyo dinhi sa nasud. (PIA SarGen) [top]
