Cebuano News: RP miseguro sa seguridad sa mga delegado sa AMM
By Rodrigo S. Victoria
Manila (17 July) -- Ang Philippine National Police (PNP) mihatag ug kaseguruhan nga ang mga delegado gikan sa 27 ka mga nasud nga mosalmot sa umaabot nga ika-40 nga ASEAN Ministerial Meeting ug kauban nga mga panagtigum sa Manila mahatagan ug ensakto nga seguridad.
"Kinahanglan nga maseguro nato ang kaluwasan niini nga okasyon tungod kay bisan unsa nga makahatag ug kadelikaduhan sa kinabuhi sa mga delegado makadaut ngadto sa bilateral nga mga interes sa nasud ug sa mga mosalmot nga ASEAN ug makigdayalugo nga mga nasud," matud pa ni PNP Director General Oscar Calderon sa usa ka pamahayag.
Ang ika-40 nga AMM, ang Post Ministerial Conferences, ug ang ika-14 nga ASEAN Regional Forum ipahigayon gikan sa Hulyo 29 ngadto sa Agosto 2 sa Philippine International Convention Center (PICC) sa Pasay City.
Si Calderon nagkanayon nga ang PNP andam sa pagpakgang sa bisan lokal o langyaw nga mga elemento nga gusto nga magsamok sa mga panagtigum.
Siya nagkanayon nga iya nang giumol ang "Task Force AMM" nga pagapangunahan ni PNP Deputy Director General Avelino Razon sa " pagmaniubra, pagmando ug paggiya sa kinatibuk-ang pagabuhaton nga operasyon sa seguridad sa tanang dapit diin ipahigayon ang mga kalihukan lakip na ang mga hotels diin ang mga delegado ipahimutang."
Si Calderon nagkanayon nga ang preparasyon sa seguridad alang sa ika-40 nga AMM ug kauban nga mga panagtigum susama kahigpit ug kadetalye, o dili sobra pa, kompara ngadto sa 12th ASEAN Summit nga gipahigayon sa Cebu niadtong milabay nga Enero.
Bisan pa sa mga taho sa mga hadla sa seguridad, ang Cebu Summit ug kauban nga mga panagtigum nagpadayon nga walay kakulian.
Si Calderon nagkanayon nga ang PNP sa koordinasyon sa Department of Foreign Affairs, Department of Health ug uban nga mga ahensya sa seguridad dili lamang maghatag ug seguridad alang sa mga delegado apan hasta ang mga pagpangandam alang sa mga panghitabo nga nagkinahanglan ug dinalian nga pagtagad aron pagseguro nga ang mga okasyon mapadayon nga hapsay.
Ang mga kapulisan nagkanayon nga ang tibuok Cultural Center of the Philippines (CCP) Complex diin ang PICC ug ang Hotel Sotifel nahimutang kinahanglan nga maayo ang seguridad ug ang mga agianan sa mga sakyanan ug mga tawo gidili layon sa mga panagtigum.
Ang PNP nagpahigayon ug dry-runs alang sa mga preparasyon sa seguridad sa CCP Complex alang sa pagpangandam sa panagtigum.
Sa sayo pa, si Chief Superintendent Romeo Hilomen, hepe sa PNP Police Security ug Protection Office nagkanayon nga ang iyang mga tawo maghatag ug hugot nga seguridad ngadto sa mga langyaw nga mga delegado ug sa ilang mga asawa sa tanang mga oras diha sa ilang pagpuyo dinhe sa nasud. Kini mao ang lain nga pwersa sa seguridad nga ipakatap sa dapit ug mga hotels diin ang mga langyaw nga mga delegado ipahamutang. (PIA-Biliran) [top]
