Cebuano News: Palasyo misuporta sa sugyot ni Esperon nga ceasefire ngadto sa mga rebelde
by Rodrigo S. Victoria
Manila (18 July) -- Ang Malacaņang mihatag sa iyang suporta kagahapong adlawa sa tulo ka tuig nga bilateral nga pag-undang sa pakig-gubat nga gilaan ni Armed Forces of the Philippines (AFP) Chief Hermogenes Esperon, Jr. ngadto sa mga komunistang rebelde isip maayo nga lakang sa pagtukod ug kompyansa nga mauy magduso ngadto sa mga negosasyon sa kalinaw kauban sa Walhon.
Si Press Secretary ug Presidential Spokesperson Ignacio R. Bunye nagkanayon sa usa ka pres briefing kagahapon sa hapon nga ang Communist Party of the Philippines/National Democratic Front (CPP-NDF) ug ang ilang armado nga kaalyado, ang New People's Army (NPA) makapakita sa ilang sinseridad sa pagduso ngadto sa paghisgot sa kalinaw pinaagi sa pagdawat sa gilaan ni Esperon.
Si Bunye mihatag sa iyang reaksyon ngadto sa gilaan nga tulo ka tuig nga bilateral nga pag-undang sa pakig-gubat sa hepe sa AFP isip nag-unang kondisyon alang sa gobyerno ug sa CPP-NDF sa pagbalik sa naundang nga mga panaghisgot sa kalinaw.
"Ang suhestyon ni General Esperon maayo nga dawaton, ug ako nagtuo nga sa bisan unsang negosasyon sa kalinaw nga magduso sa unahan, kinahanglan nga magpakita ug sinseridad sa tagsa ka mga dapit," matud pa niya.
Si Presidente Gloria Macapagal Arroyo, matud pa ni Bunye, nagklaro nga ang gobyerno gusto magpadayon sa proseso sa kalinaw apan ang "Presidente nagtan-aw usab sa uban nga mga timailhan sa sinseridad sa uban nga bahin. Kini nga administrasyon gusto nga maghulat kung kini gikinahanglan."
Si Bunye usab mibalik pag-ingon nga ang gobyerno wala magtugot nga ang extra-judicial nga pagpamatay nga gipahid sa mga militanteng walhon ngadto sa administrasyong Arroyo.
"Si Presidente Arroyo miklaro nga ang iyang administrasyon dili mopasaylo sa extra-judicial nga mga pagpamatay. Kami kusganong mipanghimaraot sa ila ug kami naghimo ug mga lakang sa pag-implementar sa mga rekomendasyon sa Melo Commission. Kami naglaum nga ang tanan motabang aron nga kita mouswag pinaagi sa pag-undang niini nga problema alang sa tanan," siya mipahayag.
Bahin sa mga taho nga ang Moro Islamic Liberation Front (MILF) nakigkunsabo sa uban nga mga myembro sa terorista nga grupo nga Abu Sayyaf, si Bunye nagkanayon nga ang gobyerno mibiya niini sa mga mekanismo nga nahibutang alang sa pag-ila kung ang gusto mobulag nga grupo nakalapas sa kasabutan sa pag-undang sa pakig-gubat.
"Kita gusto sa hustisya ug adunay mga mekanismo nga nahibutang sama sa International Monitoring Team ug ang Ceasefire Committee. Kini nga mga mekanismo kinahanglan nga hatagan ug tsansa nga motrabaho," siya mitudlo.
Bahin sa mga kahadlok nga ang balaud batok sa terorismo tingali abusohan sa mga militar, si Bunye nagkanayon nga ang gobyerno andam sa paghimo kung unsa nag gikinahanglan alang sa pagpakgang sa mga kalapsan sa balaud ug pagmentenar sa kalinaw ug kahapsay.
"Ako naghuna-huna nga kita maghatag sa tagsa-tagsa ug tsansa sa paghimo sa angay nga buhaton bisan walay ibutang nga kahadlok ngadto sa mga katawhan," matud pa niya. "Kadaghanan sa mga tawo gusto ug malinaw nga komunidad ug kita gusto nga ang mga tawo mosunod sa balaud." (PIA-Biliran) [top]
