Cebuano News: Malakanyang mipadayag og suporta sa gitanyag nga "ceasefire" sa AFP
Ni Fred Dellava
Manila (18 July) -- Mipadayag karon ang Malakanyang og suporta alang sa tulo ka tuig nga bilateral ceasefire nga gitanyag sa Armadaong Kusog sa Pilipinas (AFP) ngadto sa Communist Party of the Philippines/National Democratic Front (CCP-NDF).
Sumala kang AFP Chief Gen. Hermogenes Esperon Jr. ilang gisugyot ang hunong pinusilay kun "ceasefire" aron ma-establisar ang kompiyansa tali sa duha ka partido sa planong negosasyong pangkalinaw sa gobyerno.
Sigun pa sa Tigpamaba sa Palasyo Ignacio Bunye ang CPP-NDF ug ang armed wing niini nga New People's Army (NPA), mahimong makapakita sa ilang kamatinud-anon kalabot sa hisgutang pangkalinaw pinaagi sa pagdawat sa sugyot karon ni Esperon.
Matud ni Bunye, mahusay nga gidawat sa kagamhanan ang suhestiyon ni Heneral Esperon.
Apan nagtuo siya nga ang unsa mang negosasyong pangkalinaw nga iduso, kinahanglan aduna gyud sinseridad sa matag partido.
Si Presidente Gloria Macapagal-Arroyo, matud kang Bunye, mihimo usab og pagpatin-aw bahin niini nga uyon ang gobyerno nga ipadayon ang prosesong pangkalinaw apan ginalantaw usab sa Pangulo ang kamatinud-anon sa matag hut-ong.
Subling pagpasabot ni Bunye nga wala ginapasagdan sa gobyerno ang extra-judicial killings diin ginabasul sa ubang walhong mga militante ngadto sa administrasyong Arroyo.
Tataw matud niya nga wala nagpabaya ang Pangulo bahin sa dili makatarunganong mga pagpamatay nga nahitabo sa nasud.
Ang kamatuoran sigun niya nga hugot ginakundena sa Palasyo ang extra-judicial killings, hayan, nagahimo sila og mga lakang aron ipatuman ang mga rekomendasyon sa Melo Commission.
Naglaom ang Malakanyang nga ang matag-usa makig-alayon sa gobyerno sa pagsulbad niining suliran aron makab-ot sa katawhang Pilipinhon ang tukmang kalinaw, dugang pagpasabot ni Bunye. (PIA SarGen) [top]
