Cebuano News: Bunye malipayon sa maayong relasyon sa Pilipinas og South Korea
by Roberto M. Cabardo
Manila (25 July) -- Human napakalma ang hulga sa South Korea nga dili na mo-issue og visa sa mga Pinoy nga motrabaho sa ilang nasod isip tubag sa giingon grabe nga pagpangilkil sa mga immigration officials sa mga Koreano nga moanhi sa Pilipinas, namahayag ang usa ka opisyal sa Malacanang og maayong obserbasyon sa relasyon a duha ka nasod.
Si Press Secreatary Ignacio Bunye nagkanayon nga gikahimuot niya ang maayong relasyon tali sa Pilipinas og sa South Korea.
Matud ni Bunye sa usa ka higayon, ang pamuno nasod mismo ang nakakita sa usa ka bus paingon sa Banawe Rice Terraces nga puno sa mga batang Koreano.
Sa nasayran, mga 100,000 ka mga Koreano na ang ania karon sa nasod aron magtuon og Iningles og maglulinghayaw.
Dinhi sa Sugbo, nag-una sa tourist arrivals ang mga Koreano nga mobisita o kaha mo-eskwela.
Gawas niini daghan na sab ang salida sa telebsiyon sa nasod ang Koreanovela.
Si Bunye maoy guest speaker sa international co-production workshop tali sa National Broadcasting Network sa Pilipinas og sa Korean Broadcasting Institute.
Ang maong kalihukan giisip sa opisyal nga tukma og angay gayud nga hangopon sa mga opisyal og lumulupyo sa matag nasod. (PIA Cebu) [top]
