Cebu City (30 July) -- Aron makakuha ug mga datos alang sa socio-economic profile sa mga kabataan nga natawo ilawom sa relasyon o panagminyo sa mga Filipino ug mga Hapones, ang Center for Japanese-Filipino Children's Assistance (CJFCA) ug ang Development Action for Women Network (DAWN) mopahigayon ug nationwide nga pagpangrehistro sa mga Japanese-Filipino Children sugod sa Agosto 1 hangtud Septembre 30 karong tuiga.

Sumala kang Natividad F. Benedicto, Field Staff sa CJFCA dinhi sa Sugbo, ang mga datos nga ilang makuha niini nga pangrehistro makatabang ug daku sa ilang ahensya ug sa mga gobyerno sa Pilipinas ug sa Japan sa pag-monitor kung hain mamuyo ug unsa na'y kahimtang sa mga kabataang Japanese-Filipino sa nasud.

Mahimo usab kini nga basaran sa paghatag unya ug mga hinabang sa kagamhanan sa Pilipinas ug Japan ug ingon man sa mga non-government organizations (NGOs) nga mipahayag na sa ilang intensyon pagtabang niini nga mga kabataan.

Sayo karong tuiga, duna na'y inisyal nga survey sa mga usa ka gatos ka mga inahan ug mga JFCs. Ang resulta sa survey nagpakita nga mayoridad kanila nakasinati ug kalisud sa panalapi tungod sa kakulang sa suporta kanila sa ilang mga amahan.

Ang resulta sa survey usab nagkanayon nga ang kadaghanan kanila wala pa bisitaha sa ilang mga amahan.

Gibana-bana nga aduna'y mga 100,000 ngadto sa mga 200,000 ang populasyon sa mga JFCs sa nasud. Ang kadaghanan kanila nangatawo sa 1980s diha nga nanghingusog sa panglangyaw sa mga Filipino entertainers ngadto sa Japan.