MANILA (31 July) -- Si Foreign Affairs Secretary Alberto Romulo nag-ingon kagahapon nga sukad sa pagsugod 40 ka tuig na ang milabay, ang Association of Southeast Asian Nations (ASEAN) milambo ngadto sa usa sa pinakamalamposon nga regional groupings sa kalibutan diin nakahatag sa pagpalapad sa negosyo ug paghatag ug puhunan, pagpalambo sa kultura, ug pagpalig-on ug paghatag ug seguridad sa rehiyon.

Sa iyang mensahe atul sa pag-abli sa seremonyas sa 40th ASEAN Ministerial Meeting (AMM) kagahapon sa Philippine International Convention Center (PICC), si Romulo miingon nga ang ASEAN naghatag sa malig-on, tibuok nga kalambuan ug padulong na sa ekonomikanhong panaghiusa sa rehiyon.

"Sukad sa paghimo niini sa tuig 1967, ang ASEAN mao ang nagpahigayon sa positibong pagpalambo sa kultura, ekonomiya, politikal ug seguridad diin nakahimo ug maayo alang sa pagpatuman sa stabilidad ug progreso sa mosunod nga mga katuigan," matud pa ni Romulo.

Matud pa ni Romulo nga sukad sa tuig 1967, ang ASEAN nga adunay napulo ka miembrong nasud, nakalabang ug nakaayo sa dibisyon ug mga kasuko sa nangagi, nagsuporta sa kausbawan, stabilidad ug panaghiusa, ug nakaangkon sa respeto ug nailhan sa ubang mga nasud ug mga organisasyon, sa rehiyonal ug sa tibuok kalibutan.

"Mao nga ang ASEAN nagpaila nga usa sa pinakamalamposon nga regional groups nga migula alang sa paglambo sa kalibutan," pahayag ni Romulo. Sa kasamtangan, ang ASEAN nga mga nasud nag-apil sa malambuon nga mga kauban, magpadayon sa paglihok, pag-angkon ug pag-atubang sa mga hagit sa globalization.