Cebuano News: Kalampusan sa RP counter-terrorism gidayeg sa Southwest Pacific Dialogue meeting
By Eli C. Dalumpines
Cebu City (2 August) -- Gidayeg sa mga kanasuran nga miyembro sa Southwest Pacific Dialogue atol sa ikalima nga ministerial meeting niini sa milabay nga adlaw ang kalampusan sa Pilipinas pagpakig-batok sa terrorismo didto sa habagatang bahin sa nasud.
Matud ni Foreign Affairs Secretary Alberto G. Romulo, nga mao'y nangulo sa meeting, na-rekognisar atol sa panagtigum ang mga pama-agi nga gigamit sa Pilipinas pagbuntog sa terrorismo ug ang mga gihimo nga mga lakang sa nasud pagtanum ug binhi sa kalinaw ug kalambu-an didto sa Mindanao.
Mitambong sa nahisgutan nga panagtigum sila si Foreign Minister Alexander Downer sa Australia, Foreign Minister N. Hassan Wirajuda sa Indonesia, Foreign Minister Winston Peters sa New Zealand, Special Envoy Christopher Mero sa Papua New Guinea ug Spacial Envoy Adaljiza Magno sa Timor-Leste.
Gisaysay ni Romulo atol sa panagtigum ang walay hunong nga paggukod sa kagamhanan sa Pilipinas sa mga terrorista didto sa Mindanao ug ingon man ang pagpatuman niini ug interfaith dialogue ug ang pagpa-uswag sa basic services ug sa edukasyon ingon nga epektibo nga mga pamaagi pagpukan sa terrorismo.
Gipaluyuhan usab sa meeting ang Tripartite Forum on Interfaith Cooperation for Pecae (TFICP) nga gipanguluhan sa nasud. Kini nga Tripartite Forum gilangkuban sa mga nasud Australia, New Zealand ug Indonesia.
Gipahayag usab ni Romulo ang uban pa'ng mga natad sa panagtambayayong sa mga miyembro sa Southwest Pacific Dialogue diha sa nahisguta'ng panagtigum.
Sumala kang Romulo, apil sa gipanghisgutan mao ang counter-terrorism, transnational crimes, interfaith dialogue, disaster management, kultura ug edukasyon, pandemics ug people-to-people interaction. (PIA-Cebu) [top]
