Cebu City (3 August) -- Tungod sa problema sa lugar, ang pang-rehistro sa mga kabataang Japanese-Filipino nga nakatakda unta'ng paga-sugdan sa naglabay nga Miyerkules, Agosto 1, gisibog sa Martes, sunod semana.

Sumala kang Natividad F. Benedicto, Field Staff sa Center for Japanese-Filipino Children's Assistance (CJFCA) sa Tunga-tungang Kabisay-an, nakasugat ang iyang buhatan ug suliran bahin sa lugar nga kapahigayunan sa pang-rehistro mao nga wala sila gilayon maka-sugod sa ilang buluhaton.

Matud ni Benedicto, wala sila kahatagi ug pwesto sa Regional Consular Office sa Department of Foreign Affairs (DFA) dinhi sa rehiyon tungod sa kakulang ug lugar sa nahisguta'ng buhatan.

Apan siya nagkanayun nga ila gayu'ng pagasugdan ang pagpang-rehistro sa mga kabataang Japanese-Filipino karo'ng umaabot nga Martes apan inay nga adto kini sa Consular Office sa DFA, adto na kini pagabuhaton sa buhatan sa Commission on Human Rights nga ana-a mahimutang sa B. Rodriguez St. dinhi sa Dakbayan.

Kini nga pang-rehistro mao unya ang basihan paghatag ug hinabang ngadto sa mga kabataan nga nangatawo ubos sa panagminyo o panag-ipon sa mga Filipino ug Hapones nga mga gobyerno sa Pilipinas ug Japan ug sa mga pipila ka mga non-government organizations (NGOs) nga mipadayag na sa ilang intensyon pagtabang sa nahiguta'ng mga kabataan.

Sa gipahigayon nga insiyal nga survey sayo karong tuiga nasayran nga kadaghanan kanila lisod ang kahimtang tungod sa kagamay sa suporta nga gihatag kanila sa ilang mga Hapon nga mga amahan.

Nasayran nga nagsugod ang pagdaghan sa mga kabataang Japanese-Filipino sa 1980s diha sa pagpanglangyaw sa mga Filipina entertainers ngadto sa nasud Japan.