Waray-Waray News: Task Force kontra investment scams ginporma ni PGMA
Manila (3 August) -- Iginpagawas han Pangulo Gloria Macapagal-Arroyo an Administrative Order No. 185 nga nagpoporma hin Investor Protection Task Force (IPTF), ha panuyo nga masurapo an pagkalyap hin illegal pyramiding ngan network investment schemes nga nanbibiktima han molupyo ngan han overseas Filipino workers (OFWs).
Nagpahayag hi Sec. Eduardo Ermita nga an panguna nga buruhaton han IPTF amo an mahugot nga pag-inaw-inaw han investment schemes, lakip na an mga proyekto ha propiedades-real, ilabi na gud adton igintatanyag ha publiko ngan ha mga OFW.
Pinanngunguluhan han Department of Finance, an mga miembro han IPTF amo an Securities and Exchange Commission (SEC), Department of Trade and Industry (DTI), National Bureau of Investigation (NBI), Department of Labor and Employment (DOLE) ngan han House and Land Use Regulatory Board (HLURB).
Pira han mga mahinungdanon nga mga katungdanan han IPTF amo an masunod:
Pag-inaw-inaw han investment schemes ngan mga produkto
Paghatag hin mga pahimatngon ha publiko bahin hin mga dudable nga schemes ngan mga produkto
Pagtipig hin mga ebidensya ngan pagrekomendar hin prosekusyon ha DOJ; ngan
Pagrekomendar hin kaangayan nga balaudnon ngan mga regulasyon para han proteksyon hin usa nga manmuruhunan.
Ginmandu-an han Pangulo an IPTF nga makigsumpayan ha Department of Justice (DOJ) bahin han kahimtang han mga kaso nga ginsalawad han prosecutor's office. Kundi, kinhanglan umapartar an fiskal tikang han mga imbestigador. (PIA) [top]
