Cebuano News: PGMA midus-og sa operasyon sa MidEast Preparedness Team
By Lanie Pitao-Tupaz
Manila (6 August) -- Tungod sa pagka-alarma sa taho nga adunay mga Pilipinong mamumuo nga illegal nga gidala sa Iraq, si Presidente Arroyo midus-og sa operasyon sa Presidential Middle East Preparedness Committee (PMEPC) aron maseguro ang seguridad ug kaluwasan sa mga Pilipinong mamumuo sa Middle East.
Ang desisyon sa pagpadus-og sa operasyon sa grupo ngadto sa disyembre 31 niini nga tuig gipalig-on sa Executive Order No 640, naduso sa padayon nga tension, kagubot sa pulitika, ug armadong panagsangka sa pipila ka nasud sa Middle East, matod pa ni Executive Secretary Eduardo Ermita.
Ang termino sa PMEPC nga gipangulohan ni kanhi Armed Forces Chief of Staff ug karon Ambassador Roy Cimatu, natapos na unta sa ilang kontrata niadtong Hunyo 30 sumala sa E.O. 597 nga adunay petsa nga Enero 12, 2007.
Ang maong EO mibatbat sa dinaliang pagpanginahanglan sa PMEPC pagpadayon pagtan-aw ug pagsunod sa mga kalamboan ug paghatag sa laing mga paagi aron maseguro ang kaluwasan sa mga Pilipino didto sa Middle East.
Si Ermita mibutyag atol sa press briefing sa Malacaņang niadtong Miyerkules sa direktiba ni Presidente ngadto sa Department of Foreign Affairs (DFA) sa pagpadala ug grupo pag-imbistigar sa Middle East ug pagsuta sa taho nga adunay 51 ka mga overseas Filipino workers nga nailad pagtrabaho sa Iraq gikan sa Kuwait ug gipugos pagpatrabaho sa construction sa embahada sa United States didto sa Baghdad.
Matod pa ni Ermita, si Presidente mipahinumdom ni Ambassador Cimatu pag-andam ug pag-establisar ug tamang plano alang sa matag posibleng krisis sa pipila ka nasud ug estriktong sundon ang pagdili sa pagpadala ug mga Pilipinong trabahador ngadto sa Iraq ug Lebanon.
Si Presidente Arroyo milagda na EO 640 niadtong Hulyo 25 ug mitugot na sa pagpagawas sa P5 milyones nga dugang pondo alang sa galastohan sa operasyon sa grupo.
Ubos sa bag-ong direktiba, ang tanan miyembro sa PMEPC gipabilin ug gimandoan pagpadayon sa ilang mga trabaho ug responsibilidad nga gilaan ubos sa EO 159 nga gipetsahan niadtong Disyembre 23, 2002, nga may kalabotan sa EO 194 ug EO 195 nga parehong gipetsahan niadtong Abril 14, 2003.
Ang PMEPC gitahasan ni Presidente Arroyo sa pagtabang sa DFA ug sa uban pang mga ahensiya sa gobyerno nga may kalabutan sa kaluwasan, seguridad, ug proteksyon sa mga OFWs, ug sa paghimo ug pag-implementar sa mga palisiya, plano ug pamaagi sa koordinasyon. (PIA Biliran) [top]
