Manila (8 August) -- Igpupursigi ni President Gloria Macapagal-Arroyo nga mabutangan hin sagilayon hin mga espesyal nga hospital an iba-iba nga rehiyon han nasud agud magka may-ada higayon an magsakit tikang han mga probinsya labi na adton kulang an garastohon hin pagbiyahe ngadto ha Manila. Ine nga mga hospital in titinguhaon daw nga alid-agid han mga pasilidad hadton mga hospital nga mayda "world class".

An pahayag han Presidente in dida buhata durante han 21st Anniversary han St. Luke's Heart Institute ha Quezon City. Siring niya, iya daw ipapadagmit an pagbutang hin pasilidad ha hospital para han panambal han may mga sakit ha kasing-kasing, kidney and baga.

Idinugang pa ni Mrs. Arroyo nga ine nga mga pasilidad in ibubutang ha Vicente Sotto Memorial Hospital ha Cebu, Davao Medical Center, Northern Mindanao Regional Center ha Cagayan de Oro, Misamis Oriental ug Bicol Regional Center ha Legazpi, Albay.

Para mapagdamit an implementasyon han proyekto, gin manduan han Presidente hi Health Secretary Francisco Duque III nga umentuhan an pondo han goberno para panlawas nga pwede kuhaon tikang han nahikay nga pondo hinungdan han guti na binabayaran nga mga utang ha gawas nga mga nasud.

Siring pa niya tungod han nagtitika upay nga kabutang han panalapi han nasud, nagreresulta na an natika upay man daman nga programa han panlawas. Labot hine, nakapagbutang daw gud daman an goberno hin 10,000 nga mga Botika ng Barangay (BnB) diin napapalit in mas barubarato nga medisina han mga kablasanon.

Nagsiring pa an Presidente nga pananawagan daw daman niya an Kongreso para magpasa hin mga balaudnon para han barato nga medisina han mga kalagsan.