Waray-Waray News: P1 bilyon ginpasa han Land Bank ha gobyerno-nasyonal
Manila (9 August) -- Sugad nga kaparte han kontribusyon hini ngadto han kanan gobyerno mga panalingkamot paghikay hin pondo, nagsumiter yana nga adlaw an Land Bank of the Philippines ha gobyerno-nasyonal hin P1 bilyon nga cash dividends para han kabug-usan nga kita hini han syahan nga semestre yana nga tuig.
Ginkarawat ni Pangulo Gloria Macapagal-Arroyo an P1 bilyon nga tseke tikang kan Finance Secretary Margarito Teves ngan Land Bank President Gilda Pico durante han ika-17 nga Gawad Awards ha pagtigaman han ika-44 nga anibersaryo han LandBank ha Rizal Hall han Malacaņang.
Ginhatag naman han Pangulo an tseke kan Secretary Teves nga amo naman an magpapasa hini ha Bureau of Treasury.
Sakob hin 14 anyos, tikang han1993 ngada han 2006, P15.5 bilyon nga dividendo an nahipasa han Land Bank ha gobyerno-nasyonal.
An Land Bank amo an opisyal nga deposituhan nga bangko han gobyerno. Waray hini pondo nga nakakarawat tikang ha gobyerno para magamit ha pag-implementar hin countryside development nga mga aktibidades. Lugod, nagamit an Land Bank hin kohida nga nahikay tikang han ira commercial banking operations agud mahipadayon an mga programa hini ha maglain-lain nga dapit han nasud.
Pira han mga programa nga ginpapatuman han Land Bank amo an pautang ha mga kooperatiba hin mga parag-uma ngan parapangisda, microenterprises ngan small and medium enterprises ngan institutional-building nga ayuda ha mga kooperatiba. (PIA) [top]
