Cebuano News: Pahat pagtukod og mga tunghaan gipatas-an sa P3.9 bilyones
by Rey Anthony Chiu
Manila (9 August) -- LAING usa ka bilyon ang gidungag sa kasamtangang P2.9B nga pahat alang sa pagpatukod og dugang mga lawak tunghaan aron hinay'ng solbaron ang suliran sa edukasyon sa nasud.
Karon, anaa na sa P3.9B ang pundong magamit sa mga tinugyanan aron tubagon ang panginahanglan sa dugang mga lawak tunghaan, ug aron ipakutay ang mga internet sa tumong nga itaas pa ang kalidad sa kahibalo sa mga magtutuon nga Pinoy.
Si Presidente Gloria Macapagal-Arroyo mismo ang mibutyag sa dugang nga pahat sa usa ka pagbisita sa Quezon City.
Gilusad usab sa pangulo nasud ang accreditation ug equivalency program sa Bureau of Alternative Learning Center (BALC) sa Departamento sa Edukasyon (DepEd).
Ang programa, nga ginganlan og eSKWELA, bukas ngadto sa mga tinun-an sa elementarya ug high school nga na-undang sa pagtungha.
Giingong ang mga napa-undang sa pagtungha mahimong ma-promote o mopadayon kon makalabang sa mga pasulit sa accreditation ug equivalency nga ihatag sa DepEd matag Pebrero.
Matud ni BALC Director Dr. Carolina Guevarra, ilawom sa programang eSKWELA, ug inabagan sa the Commission on Information and Communications Technology (CICT), ang mga magtutuon giyahan sa mga mobisita nga magtutudlo nga ug tigdumala sa mga leksyon.
Kon mahuman ang instruksyon, dawaton sa mga magtutuon ang sertifico sa pagtapos nga lagdaan sa Kalihim sa DepEd.
Kasamtangang upat na ka sentro sa eSKWELA ang natukod sa nasud. (PIA) [top]
