MANILA (13 August) -- Si Presidente Gloria Macapagal Arroyo mapasigarbohon ug maoy nag-una sa tibuok nasud nga pagsa-ulog labot sa kadaugan sa mga Pilipinong boksidor didto sa World Boxing Cup sa Arco Arena, Sacramento, California, batok sa mga Mexicano nga maoy ilang kontra.

Sa usa ka pamahayag, ang Presidente midayeg sa mga kampeon sa boxing kinsa iyang gitawag nga simbolo sa "Filipino excellence and persistence."

"Ako miduyog sa nasud nga Pilipinhon sa paghatag sa kinasing-kasing nga pahalipay sa atong mga boxing champs tungod sa ilang kadaugan batok sa Mexico," nagkanayon ang Presidente.

Ang grupo sa mga Pinoy boksidor gilangkoban nila ni Gerry Penalosa, Z. Gorres, AJ Banal, Michael Domingo ug Diosdado Gabi pulos mipildi sa ilang mga kaatbang -- Jhonny Gonzales, Eric Ortiz, Jorge Cardenas, Miguel Roman ug Jose Beranza, sa tagsa-tagsa nila ka engkwentro aron madaug ang $500,000 cash prize ingon man ang World Cup trophy.

Bugtong si Rey "Boom Boom" Bautista lamang sa unom ka mga Pinoy boxers ang napildi sa iyang Mexicano nga kontra, si WBO super bantam weight Daniel Ponce de Leon.

"Si Gerry Penalosa nakapakita og talagsaong kaisog ug abilidad sa pagdaug sa maong titulo," matud pa sa Pangulo.

Siya mipuno pag-ingon nga ang kapildihan ni Boom Boom Bautista usa ka temporaryo lamang nga kapakyasan, ug mobarug ra gihapon ang maong boksidor uban unya ang dugang kusog ug desidedo nga tinguha.

"Sila, ang atong mga Filipino boxers, nagsilbi nga mga role models alang sa atong mga batan-on ug sila nagdasig kanato sa paglihok pa, sa pagpaningkamot pa alang sa usa ka hiniusa ug madaugon nga kaugmaon," ni Pangulong Arroyo pa.

Ubos sa lagda sa Boxing World Cup, ang nasud nga mas daghang daug maoy maka-angkon sa pasidungog nga World Cup ug sa trophy nga nagkantidad nga $500,000.