Manila (13 August) -- Pinanngunahan ni Pangulo Gloria Macapagal-Arroyo an nasud yana ha pagselebrar han kadaugan han mga Pilipino nga mga boksingero kuntra han ira mga panguntra nga mga Mexikano dida han World Boxing Cup didto ha Arco Arena ha Sacramento, California.

Dida hin usa nga pahayag, gindayaw han Pangulo an mga kampeon nga mga boksingero nga iya gintawag nga "mga simbolo han superioridad ngan determinasyon han Pilipino."

"Naduyog ako han katawhan-Pilipino ha paghatag han aton kinasingkasing nga paglamano ha aton mga kampeon nga mga boksingero para han ira kadaugan kuntra han Mexiko," siring han Pangulo.

An delegasyon han Pilipinas nga ginkokomponer nira Gerry Peñalosa, Z Gorres, AJ Banal, Michael Domingo ngan Diosdado Gabi en namagdaug kuntra han ira tagsa-tagsa panguntra nga mga Mexikano nga hira Jhonny Gonzales, Eric Ortiz, Jorge Cardenas, Miguel Roman ngan Jose Beranza nga nakapaangkon ha ira han 500 mil dolares nga cash nga premyo ngan tropeo han World Cup.

Hi Rey 'Boom Boom' Bautista la han unom nga Pinoy nga mga boksingero an napirde kuntra han iya Mexikano nga panguntra nga hi WBO super bantam weight Daniel Ponce de Leon.

"Usa nga makalilisang nga ka-isog ngan abilidad an iginpakita ni Gerry Peñalosa ha pagda-ug niya han iya titulo," siring han Pangulo.

Nagsiring pa an Pangulo nga "an kapirdihan ni Boom Boom Bautista en temporaryo la nga balaong, usa nga kapirdihan nga iya babangunan upod en darudaku nga kusog ngan determinasyon."

"Nagseserbe nga mga ehemplo ha aton mga katan-uan an mga boksingero nga mga Pilipino samtang naghahatag hin inspirasyon ha aton nga labaw pa manlimbasug para hin nagkaka-urusa ngan madina-ugon nga tidaraon," siring niya.

Ilarum han regulasyones han World Boxing Cup, maangkon han nasud an World Cup, usa nga tropeo nga ginbabana-bana nga nakantidad hin 500 mil dolares, kanay mga boksingero en darudamo an da-ug.