BORONGAN CITY (August 15) -- Panuyo han ofensiba han militar ha Sulu ngan Basilan nga matagan hin seguridad an mga sundalo han gobyerno, mamentinar an kamurayaw ngan mahugot maipatuman an balaud kuntra hin mga grupo hin mga terorista nga ha diri pa la maiha nahidabi ha panmugot hin mga sundalo ha Basilan. Karuyag gihapon han gobyerno nga malikayan an paglarab pa hin darudako nga giyera ngan nanlilimbasug nga malikayan nga magin biktima en mga sibilyan.

Nagpagawas an Pangulo hin mga direktiba panseguridad para makontrolar an mga operasyon-militar ha Basilan ngan Sulu agud naman malikayan nga magkabibiktima en mga sibilyan, maataman ngan maipadayon an proseso pankamurayawan ha Moro Islamic Liberation Front (MILF) ngan respitaran an mga aludaydayan han ceasefire kun udongpupsilay ha duok nga pakikigsumpayan han International Monitoring Team (IMT).

Iginmando gihapon ni Pangulo Arroyo an pagdumara hin kadagmitan nga hiruhimangraw ngada han MILF ilarum han pagpaluyo han Malaysia agud matagan hin solusyon an sitwasyon ha Basilan ngan Sulu, paggamit han Bishop Ulama Conference ngan iba pa nga mga relihiyoso nga grupo ngan lain pa nga mga sektor han katilingban para han kanan gobyerno panlimbasug ha kamurayawan ha Mindanao ngan saysayan an Organization of Islamic Conference (OIC) Committee of Eight bahin han limitado nga operasyon-militar ngan an Mindanao development nga nag-uupod hin daku nga pondo han 2007 ngan 2008 nga mga budget para han Mindanao, lakip na an Basilan ngan Sulu.