By Erna Sy Gorne

Manila (16 August) -- Pres. Gloria Macapagal-Arroyo mipahibalo sa pagdoble sa pundo sa pangagamhanan alang sa paghimo ug mga balay sa tuig 2008 ngadto sa Php 7 bilyones gikan sa Php 3 bilyones karong tuiga aron sa paghatag ug dugang kahigayonan sa mga Pilipino sa pag-angkon ug mga balay.

Ang Presidente mihimo sa maong pahibalo sa diha nga mibisita siya sa Barangay 175 didto sa Camarin, Caloocan City kagahapon diin gihimo usab ang pag-apod-apod sa mga sertipiko sa mga balay ngadto sa 10 ka mga residente sa mga barangay.

Matud niya ang gi-usbaw nga pundo alang sa paghimo ug mga balay gitumong sa pagpadayon sa programa sa iyang administrasyon sa pagpalapad sa pagkabaton ug mga balay dinhi sa nasud.

Napulo sa mga residente karon mapasigarbohon na nga mga tag-iya sa mga kondominium sa bag-o pa lang natapos nga New Haven Condominium sa Barangay 175, Camarin.

Ang New Haven Condominium kabahin sa proyekto sa gobierno nga maghatag ug makab-ot nga paghimo ug mga balay ngadto sa mga Pilipino pinaagi sa National Housing Authority (NHA).

Ang Presidente mipasabot nga ang implementasyon sa reporma sa panalapi nakatabang sa ekonomiya sa nasud, maingon man sa mga rekurso sa gobierno ug sa iyang kapasidad sa pagkuha sa nagkalainlaing mga importante nga pro-poor nga mga proyekto, sama sa paghimo ug mga balay.

Ang Presidente mihatag usab ug Philhealth cards ngadto sa mga residente sa barangay ug 120 nga Technical Education ug Skills Development Authority (TESDA) training alang sa Work Scholarship.