Cebuano News: Muslim Affairs mipasalig nga way MILF o Abu Sayyaf sa Central Visayas
by Roberto M. Cabardo
Cebu City (August 23) -- Gipasalig sa Office of Muslim Affairs nga way elemento sa mga rebeldeng Muslim og Abbu Sayyaf nga nitago dinhi sa Sugbo.
Nahibaw-an sa DYRB Banat News nga ang grupo sa mga Muslim dinhi nipalig-on karon sa pagbantay batok sa posibleng pag-abot sa mga miyembro sa mga rebeldeng Muslim og Abbu Sayyaf dinhi sa tunga-tungang Kabisay-an.
Gibutyag sa regional director sa Office of Muslim Affairs sa Central Visayas, Sakiran Hajan nga ang mga lider sa Muslim communities sa rehiyon padayon nga nagmonitor karon sa mga moabot nga mga Muslim dinhi sa rehiyon.
Kini aron pagseguro nga walay sakop sa mga rebeldeng Muslim og bandidong Abbu Sayyaf ang makatago ilabi na dinhi sa Sugbo.
Si Hajan nibutyag sab nga adunay napulo ka mga lider sa Muslim Communities dinhi sa Sugbo, og biente sa Metro Cebu. Sa kinatibuk-an, adunay sobra sa trienta ka mga Muslim leaders ang ania sa tunga-tungang Kabisay-an. (PIA Cebu) [top]
