Cebuano News: PGMA miawhag sa mga Pilipino nga "mananum ug lana sa yuta"
Tagbilaran City (29 August) -- "Kon dili kita makakob-kub ug lana, mananum kita." Mao kini ang nag-unang awhag ni Presidente Gloria Macapagal-Arroyo aron dili na magsalig ang nasud ug lana sa gawas.
Ang kagamhanan mi-lantaw karon sa mga benepisyo sa tuba-tuba nga mamahimong nag-unang alternatibo sa enerhiya sa nasud, ug aron maus-osan na ang gastuhonon sa crudo.
Sa "Pulong Bayan" didto sa Jatropha Demo and Seed Production Farm sa Bukidnon, gipasabot sa Presidente nga ang Pilipino mananum niining "magic tree", ug uban pang mga variety niini para dili na moangkat ang nasud ug lana sa gawas, paghatag ug laing panginabuhian sa mga mag-uuma, ug ang paglimpyo sa kinaiyahan gumikan kay kini, dili man makadaut sa hangin.
Gilantaw usab ni Presidente Arroyo ang posibilidad nga ang kagamhanang nasyonal motanum ug tuba-tuba isip solusyon sa programang pananum sa nasud.
Iya usab nga gimanduan ang DENR, nga i-repaso ug ilusad pagbalik and DENR Order 2005-05 nga mao ang Project 727 o ang kinatibuk-ang programa sa pananum o reforestation.
Dinhi sa Bohol, gilantaw usab sa kagamahanang probinsyal ang pagpananum ug tuba-tuba isip tabang ug alternatibong panginabuhian sa mga mag-uuma, ug usa sa mga programa sa pagkunhod sa kawad-on dinhi sa lalawigan. (PIA Bohol) [top]
