Ni Fred Dellava

Ciudad sa Heneral Santos (30 Agosto) -- Pormal na nga gi-ablihan ang ika-9 nga National Tuna Congress Exhibit KCC Mall Atrium dinhi alayon sa selebrasyon sa 9th Tuna festival sa General Santos City.

Gani, nanguna sa opening ceremony sa maong aktibidades mao ang Director-General sa Presidential Management Staff, ingon man Cabinet Oversight Officer alang sa MSMEs Secretary Cerge Remonde, kauban ang pipila ka mga opisyales ug negosyante sa syudad.

Ang 9th National Tuna Congress mo-highlight usab sa OTOP kon One Town One Product sa syudad.

Atol sa iyang keynote address, si Remonde nagbutyag sa kamaayohan sa imahe sa patigayon sa lungsod ngadto sa mga exhibitors ug mga negosyante ilabina sa industriya sa tuna sa nasud.

Sa pikas bahin, gikanayon usab ni Remonde nga ginapalig-on sa nasudnong gobyerno ang suporta niini ngadto sa syudad alang sa pagpalambo sa mga pamatigayong tuna. Ang tinuod matud pa niya, ang pagpa-uswag sa industriya sa tuna maoy nag-unang agyenda sa Philippines American Trade Mission, diin gipasiugdahan ilawom sa Arroyo administration.

Hinuon, iya usab ginadasig ang media nga tabangan ang sektor sa negosyo aron i-istablisar ang maayong imahe sa patigayon ilabina sa idustriya sa Tuna diin dako usab nga ika-abag sa pagpa-uswag sa turismo dinhi.

Ang industriya sa Tuna naga-generate og kapin 40 bilyones pisos sa ekonomikanhong aktibidades, mikontribyut og 60 porsyento sa kinatibuk-ang kita sa siyudad, nagakita og 280 milyones dolyares sa export ug nakapatrabaho og kapin 120 mil ka mga tawo.