Manila (30 August) -- Si Presidente Gloria Macapagal Arroyo mipasalig sa mga mag-uuma nga buot mananom og tuba-tuba kon jatropha didto sa Bukidnon, Cagayan De Oro City ug uban pang bahin sa Northern Mindanao nga hugot ang pag-paluyo sa gobyerno alang ning maong kalihokan.

Ang dinaghan nga pagpananom sa tuba-tuba gituyo sa tinguha nga makakitag laing kakuhaan og sugnod ang kagamhanan aron dili hingpit nga magsalig sa fuel imports, ug aron usab mahinlo ang ibuga sa tambotso sa mga sakyanan, mobalik ang ka-berde sa kabukiran, ug makahatag kapanarbahoan sa mga katawhan sa kabaryohan, matud sa Pangulo.

Gihimo sa Presidente ang maong pasalig sa usa ka "pulong-bayan" didto sa usa ka jatropha demonstration ug seed farm sa Bukidnon, diin kauban niya ang pipila ka opisyal sa gabinete ug ang taga PNOC-Alternative Fuels Corporation.

Aron ka-suportahan ang mga mag-uuma, ang Land Bank of the Philippines (LBP), pinaagi sa President ug Chief Executive Officer niini nga si Gilda Pico, mipahibalo diha gihapon sa "pulong-bayan" nga dunay gigahin nga P 10 billion alang sa jatropha production alang sa 200,000 ka ektarya nga kayutaan sa Mindanao.

Ang maong pundo mahimong ma-angkon sa mga farmers groups pinaagi sa mga rural banks isip mga loan conduits o kaha pinaagi sa LBP-accredited cooperatives segun sa awhag ni Bukidnon Governor Jose Ma. Zubiri, Jr.

Samtang gipasabot usab ni Gov. Zubiri nga ubos sa ilang provincial plan, ang tanang mga yuta nga way gamit ug wa maugmad pagatamnan og tuba-tuba, sama sa mga lungsod sa District 1, ang Malitbog, Kalilangan, Talakag, ug sa District 2, ang mga lungsod sa Cabanglasan, Impasug-ong, ug Malaybalay.

Ug aron kini mahimo, ang provincial government sa Bukidnon u gang PNOC-AFC mohimo og Memorandum of Agreement (MOA) diin ang naulahi maoy mopalit sa liso sa tuba-tuba ug maoy moapod-apod sa mga mananom.