MANILA (31 August) -- Si Presidente Gloria Macapagal Arroyo namahayag nga ang mga maisogon nga reporma sa ekonomiya nga gidugso sa iyang administrasyon nasuta nga naglihok kini sa tinuoray, ug naka-mugna og igo-igong pundong gikinahanglan alang sa tinguha sa gobyerno pag-paubos sa kapobrehon sa nasud.

Sa usa ka press briefing didto sa Malacanang kagahapon sa buntag, gipatin-aw sa Pangulo nga ang paghaw-as sa kakabus ug kawad-on mao gyoy gitutukan nga rumbohon sa iyang administrasyon.

Ang pag-us-us sa kakabus mao usab ang naghatag og kusog sa mga economic reform programs nga gipasiugdahan sa kagamhanan, dugang pasabot sa Presidente.

"Pagmenos sa kapobre maoy atong 'over-riding objective' -- ang pagbalansi sa panudlanan sa nasud maoy unang lakang lamang; gihimo nato ang dugay nang angay buhaton labot sa pagbubo og puhunan sa 'human' ug 'physical infrastructure', " ni Pangulong Arroyo pa.

Ang pag-usbaw sa katakus sa nasud nga makig-kompetensiya tipik ug kabahin usab sa pamaagi pagkunhod sa kawad-on, diin ang pagbubo og puhunan sa mga magpapatigayon makamugna usab of dugang trabaho, ug sa ingon mo-us-us usab ang kalisod.

"Lakip na dinhi ang nabubo na nga binilyon ka piso sa edukasyon, pag-alima sa panglawas, bag-ong mga tulay, kalsada, ug mga pantalan," nagkanayon ang Presidente.

Gibalik-lantaw sa Pangulo ang pagduda sa uban dihang gisugdan niya ang iyang gimbuhaton.

"Walay nagtoo kaniadto nga maka-angkon kita og dugang kita, mapuo ang mga limbongan sa buhis, malign-on ang peso, ug molihok ang stock market. Walay nagtoo kanhi nga ma-balanse nato ang atong budget, masayo nato pagbayad ang atong utang, ug kapun-an ang trabaho, apan kining tanan nahimo nato," ang Presidente miingon.