Manila (31 August) -- Sa ikaduhang tulo ka buwan niining tuiga, ang gross domestic product kon GDP misaka bali og 7.5% -- ang kinapas-pasang pag-isa sulod sa kawhaan (20) ka tuig.

Kini ang malipayong gipahibalo kagahapon sa buntag ni Pangulong Gloria Macapagal Arroyo didto sa Malacanang.

"Ang gross national product mi-isa bali og 8.3% -- ug kini nakatubo sa atong ekonomiya bali og 7.3% sa unang unom ka bulan sa tuig, ug busa kita kompyansa nga makab-ot ra nato ang tibuok tuig nga panglantaw nga anha diha sa 6.1 ngadto na sa 6.7 porsiyento," miingon ang Presidente.

Sa samang higayon, gitataw sa Pangulo nga mas daghan pang mga trabaho ang angay pang buhaton ug busa dili angay nga molunga ang gobyerno, dili gani kini angay mopahuway tungod lang sa na-angkon karon nga kalamposan.

"Dili kita angay mohunong bisan makadiyot. Hinunua, angay lang ipadayon pa kini sa pagsulong ug sustenihan ang buwelo sa mosunod nga tulo ka tuig. Ang mga positibong resulta sa gihimo natong mga kabag-ohan sa ekonomiya kinahanglan nga mahubad kini ngadto sa tino nga mga kaayohan nga masinati sa mga katawhan," dugang pasabot sa Presidente.

Subay niini, giawhag ni Pangulong Arroyo ang mga lideres sa negosyo, kinsa diha naminaw kaniya, sa paghiusa sa economic team sa gobyerno aron ituboy pa ang dugang mga "crucial initiatives" tumong sa mas paspas pa gyod nga pagtubo.

Kining mga inisyatibo naglakip ning mosunod: (1) pagkab-ot sa revenue ug deficit targets aron magpabilin ang investor ug creditor confidence ug magpadayon ang lig-on nga pag-aginod sa low-interest capital; (2) pang-hingusgan pa ang domestic growth ug investment, labina ang mga micro, small ug medium enterprises, exports ug agri-business, tourism ug infrastructure, ug tubagon ang kahingawa sa mga negosyo labot sa bayranan sa koryente ug "red tape"; ug (3) "sa way kukaluoy lumpagon ang mga babag paingon sa dugay nang nalangan nga mga proyekto sa infraestruktura."