Cebuano News: Ekonomiya mitubo ug 7.3%, matud ni Presidente Arroyo
Manila (31 August) -- Gipahayag ni Presidente Gloria Macapagal Arroyo nga mitubo ang ekonomiya sa nasud sa unang unom ka buwan karong tuiga.
Sa usa ka media briefing nga gipahigayon kaganinang buntag, gibutyag ni Presidente Arroyo nga misaka ug 7.5% ang Gross Domestic Product (GDP) sa nasud sa ikaduhang kwarter sa tuig samtang ang Gross National Product (GNP) mitala usab ug 8.3% hinungdan sa pagtubo sa ekonomiya sa unang unom ka buwan karong tuiga ug 7.3%.
Kini nga pagsaka sa GDP, matud pa, maoy pinakataas nga natala sa sulod sa 20 ka-tuig. Tungod niini, kumpyansa ang pangulo nga makab-ot sa gobyerno ang iyang target sa tibook tuig nga 6.1 ngadto sa 6.7 ka porsyento.
Ang daku nga remittances ug lig-on nga performance sa negosyo, construction, manufacturing ug ang padayon nga pagsaka sa paggasto matag-panimalay ingon man ang pamuhunan sa constuction maoy gitumbok nga hinungdan sa pagsaka sa GDP sa nasud.
Gitumbok usab ang stable interest rates, paglig-on sa peso, serbisyo ug ang paggasto sa milabay nga eleksyon nga naka-tampo usab sa pagtubo sa ekonomiya sugod sa Abril ngadto sa Hunyo.
Giaghat sa presidente ang matag-sektor nga padayon nga sustenihan ang pagtubo sa ekonomiya. Iya usab nga gitawgan ang mga business leaders sa nasud nga ubanan ang iyang economic team aron makab-ot ang revenue ug deficit targets, mapa-ubos sa interest rates ug mapakusgan pa ang pagtubo sa lokal nga negosyo ug pamuhunan.
Kasumpay niini nga balita, misaka usab ang composite index sa Philippine Stock Exchange samtang ang balor sa peso kontra dolyar mikusog usab. Ang balor sa peso matag-dolyar kaganina mitala ug P46.66 itandi sa P46.83 kaniadtong Miyerkules.
Si Acting Socio-Economic Planning Secretary Augusto Santos nagkanayun nga ang pagkusog sa performance sa ekonomiya nagpakita sa ka-epektibo sa macro-economic nga reporma sa gobyerno. (ECD/PIA 7) [top]