Cebuano News: PCA gihangyo'ng maghimo'g checkpoints sa mga botong nga mosulod sa Tagbilaran
by Rey Anthony Chiu
Tagbilaran City (5 October) -- GISUGYOT na ngadto sa Philippine Coconut Authority (PCA) nga magtukod og mga checkpoints aron pugngan ang pagpamaligya sa mga botong nga mahimong gikan sa mga lubi nga giatake sa dangan nga brontispa.
Gikahadlok karon ang pagpamaligya sa mga botong nga nakuha sa mga lubi nga padayon pang gitambalan sa kemikal aron patyon ang dangan.
Gitumbok na sa PCA ang pagkatap sa dangan didto sa kalubihan sa Panglao, Dauis ug Baclayon, diin ang mga tinugyanan sa ahensya migamit nag kemikal aron pagpatay sa mga peste.
Giingon ni PCA manager Timoteo Lago Jr. nga dili luwas ang pagkaon sa botong nga gikan sa tinambalan nga lubi gawas kon malapas na sa tulo ka buwan human kini nabutangan sa kemikal nga hilo.
Kini subay usab sa laraw sa mga kadagkuan sa nasudnong Departmento sa Agricultura (DA) nga makigtagbo sa mga kapolisan aron mapatuman ang mga lakang pagpatuman sa kwarantina niini.
Gawas pa, makigtigum usab sa Kalihim Arthur Yap sa mga kadagkuan sa kalungsuran og lalawigan aron mahipno ang mga pamaagi sa pagpatuman sa mga dinaliang lakang aron sumpo-on ang pagkatap sa peste nga mahimong mag-papas sa P40-bilyones nga industrya sa lubi dinhi sa nasud.
Kahinumduman nga giluwatan ni Pres. Gloria Macapagal Arroyo ang Executive Order 664 human gitaho sa DA pagkatap sa pesteng naghulga sa industriya sa lubi.
Giluwanan na usab sa DA ang kwarantina sa Metro Manila ug 26 ka lalawigan lakip na ang Bohol diin namatikdan ang pagpangataki sa coconut leaf beetle. (PIA) [top]
