Tagbilaran City (5 October) -- GIPALAPAD karon sa Bureau of Plant Industry (BPI) ang pag-awhag sa mga banay nga Pilipino sa pagpananum og mga backyard gardens aron maka-abag sa panginahanglan niini sa pagkaon.

Ang BPI, ahensya nga sakop sa Department of Agriculture (DA) pinaagi ni officer-in-charge Joel S. Rudinas mibutyag nga mahimong mas maayo pa ang tubag sa katawhan sa sugyot. Kasamtangang 766,863 na ka households sa nasud ang nalakip sa Programang Gulayan Para SA Masa.

Buot sa BPI nga human ning buwan sa Octubre, makab-ot na sa BPI ang 851 mil ka bubong ang may kaugalingong tanaman sa lagutmon.

Matud ni Rudinas, ang sobra sa ilang makunsumo, mahimo pa nga itumod ngadto sa mga Barangay Food Terminals (BFT).

Ubos sa programang gisuportahan sa kagamhanan, mahimo nga mananum og talong, kamote, kamatis ug uban pang lagutmon.

Tulo ka paagi karon ang gipadayon sa pagpatuman sa programa, segun sa BPI.

Mahimo nga sundon ang indibidwal nga garden, o katilingbanong tamnanan ug ang ikatrulo, mao ang garden sa mga tunghaan, matud sa BPI.

Ang Programang Gulayan para sa Masa usa lang sa upat ka paagi nga gisagop sa kagamhanan aron kubsan ang kagutom sa nasud.

Ubos ning programa, ang DA Regional Field Units manghatag og mga liso, bansay-bansay ug mga libreng serbisyo alang sa mga buot mosalmot niini.