Waray-Waray News: PGMA naghatag pasidungog san upat nga Navy nga namatay sa engkwentro sa Basilan
By Ailene N. Diaz
Manila (10 October) -- Si Presidente Gloria Macapagal Arroyo naghatag sin pasidungog san upat nga Navay nga namatay san engkwentro kontra terorista nga grupo Abu Sayyaf san nakalabay nga Oktobre dos mientras aada sira nagpapanalipod san seguridad san mga sibilyan nga mga residente ngan naprotehir san pace ordain sa Basilan.
Presko pa tikang san iya pagbisita sa Pampangga diin namuno an Presidente san "Go Negosyo" caravan san Bren Guia Convention Center sa San Fernando City, an Presidente sumakay san iya chopper ngan dumiritso para personal nga makilaoy san mga pamilya ngan mga kauropdan san nagkamatay nga mga sundalo.
Ginpasidunggan sin Gold Medal (posthumous) san Presidente sira Navy men Michael M. Abrio, Ruel D. Peralta, Joe Vicente B. Sistosa ngan Jay M. Zogutan.
An mga nagkakasamaran san nasabi nga engkwentro nga presente naka confine sa Camp Navarro General Hospital sa Western Mindanao Command (WESTMONCOM) sa Zamboanga City mao sira LtLG Roderick G. Cayetano ngan Armando N. Labrador.
Si Defemse Secretary Gilbert Teodoro, ngan Chief of Staff Gen. Hermogenes Esperon, Jr san pwersa armada san Pilipinas mao an nag upod kan Presidente san iya pagbisita san Our Lady of La Naval Chapel sa sulod san Naval Base sa Sangley point.
Nakadto gihapon sira Flag Officer in Command Admiral Rogelio Calunsag, Philippine Fleet Commander Rear Admiral Petrolino Magno ngan Naval Base Cavite Commander Commodore Ramon Punzalan ngan iba pa.
Katapos san seremonyas, an Presidente nag imud san mga patay nga lawas san mga biktima ngan nakig-uru estorya san mga pinanbayaan nga mga kaasaw-an.
Sadto nga Hulyo 14, an Presidente namuno liwat san nasud san paghatag pasidungog sadton mga ginkikilala nga mga bayani san katorse nga mga Philippine Marines nga ginpamatay ngan gin utod-utod san natabo nga ambush didto manta sa Basilan. (PIA-Northern Samar) [top]
