by Rey Anthony Chiu

Tagbilaran City (17 October) -- USA ka text brigade ang gilantaw sa Kapitolyo isip epektibong panawagan alang sa mga pangulo sa tibuok kalibutan sa pagbarug batok sa kawad-on.

Kini samtang gihandum sa Pilipinas nga makahimo og laing Guinness world record alang sa labing daghang tawo nga mibarug batok sa kawad-on.

Ang laraw sa Kapitolyo nsaukip sa usa ka memorandum diin gimanduan ang matag empleyado sa pagbarug sulod sa 5 minutos ug dayon mopadala pinaagi sa text sa lima ka kaila niini sa slogan nga nag-ingon: "Kumilos, Manindigan, labanan ang kahirapan."

Kini dungang himoon sa alas tres sa hapon sa Oktubre 17, segun sa gipirmahang memorandum sa gobernador. Ang Oktubre 17 maoy Int'l Day for the Eradication of Poverty.

Kini usab pinasikad sa gisugdan nga kampanya nga gilantaw'ng apilan sa may tres milyones ka Pilipino kinsa mobarug subay sa "Stand Up, Speak Out Campaign,".

Ang lukop kalibutan'g kampanya magduso usab sa mga pamuno sa mga nasud nga tumanon ang panaad sa Millennium Development Goals (MDGs).

Sa kampanya, ang Tinipong Nasud padayong nagpahinumdom sa mga kagamhanan nga tumanon na ang saad pagkabot sa MDGs, ilabi na sa pagbuntog sa kawad-on.

Usa ang Pilipinas sa 191 ka nasud nga milagda sa Millennium Declaration, diin nagsukip sa mga panaad pagkab-ot sa MDGs, makigbatok sa kawad-on, kagutom, sakit, pagka-daut sa kalikopan ug ang pagpanaud-daug sa 2015.

Sa miaging tuig, natala sa Guiness Book of World Records ang 24 milyones ka katawhang gikan sa 87 ka nasud nga mibarug sulod sa 24 oras.