Cebuano News: Comelec mipahigayon ug candidates seminar
By Rodrigo S. Victoria
Naval, Biliran (24 October) -- Mipahigayon ug candidates seminar ang Commission on Elections (Comelec) ngadto sa mga kandidato sa Barangay ug SK elections sa 26 ka mga barangay sa lungsod sa Naval.
Ang pagpahigayon sa maong candidates seminar nga gitambungan sa mga kandidato sa 26 ka mga barangay sa lungsod sa Naval gitumong alang sa paghatag ug mga kaalam ug hibalo ngadto sa mga kandidato sa mga ensakto nga mga regulasyon ug balaud nga pagasundon sa panahon sa eleksyon.
Ang 26 ka mga barangay sa lungsod sa Naval gibahin sa duha ka grupo diin ang unang grupo sa mga kandidato nga gilangkuban sa mga barangay sa P.I Garcia, Smo. Rosario, Atipolo, Agpangi, Sabang, Sto. Niņo, Caraycaray, Catmon, Borac, Haguikhikan, San Pablo, Calumpang, Libertad ug Mabini ang gipahigayon niadtong Oktubre 16, 2007.
Ang laing mga kandidato sa 12 pa ka mga barangay nga mipaubos sa candidates seminar nagagikan sa mga barangay sa Libtong, Cabungaan, Villacaneja, Capiņahan, Lucsuon, Villaconsuelo, Larrazabal, Talustusan, P.S. Eamiguel, Imelda, Lico ug Anislagan ang gipahigayon pagka-sunod adlaw.
Ang tanang mga kandidato sa Sangguniang Kabataan (SK) sa 26 ka mga barangay sa lungsod sa Naval ang mipaubos usab sa candidates seminar niadtong Oktubre 20, 2007.
Ang maong mga gitalaan nga candidates seminar gipahigayon didto sa NIT Gymnasium.
Ang mga pinasidunggang dinapit sa unang adlaw sa gipahigayon nga candidates seminar didto sa NIT Gymnasium mao si Atty. Adolfo Ibaņez, Regional Election Director ug Atty. Richard Japson, Regional Attorney sa Comelec regional office sa rehiyon 8 diin sila usab mipahigayon ug pagtudlo ngadto sa mga kandidato.
Si Atty. Ibaņez mihatag ug pagtudlo sa mga topiko sama sa Election as Democratic Exercises and Philippine Electorate ug Electoral Processes and Procedures with Anatomy of Electoral Fraud.
Sa laing bahin si Atty. Japson mihatag usab sa pagtudlo bahin sa General Instruction for Board of Election Tellers (BETs) and Barangay Board of Canvassers (BBOCs) and Overview on the Preparation and Safekeeping of Election Returns (ERs) and other Election Forms and Paraphernalias
Mihatag usab sa ilang mga pagtudlo mao sila si Atty. Sabino C. Mejarito, Provincial Election Supervisor sa Comelec-Biliran bahin sa Poll Watching ug Marietta Ventulan, Election Officer sa Naval mahitungod sa Fair Election Act and R.A. 9164, An Act Providing for Synchronized Brgy. and Sangunian Kabataan Brgy. Amending R.A. 7160 (Local Government Code of 1991). (PIA-Biliran) [top]
