Cebuano News: Kanhi Presidente Erap makagawas na sa prisohan
By Dennis O. Garay
Manila (26 October) -- Si Presidente Gloria Macapagal-Arroyo kagahapon mihatag sa executive clemency o pardon ngadto kang kanhi presidenti Joseph Ejercito Estrada, nga nakonbikto sa plunder sa Sandiganbayan anti-graft court niadtong Septembre 12.
Si Press Secretary ug Presidential Spokesman Ignacio Bunye, miingon nga maoy polisiya sa administrasyon sa pag pagawas og binilanggo kinsa mo-abot na sa 70 ang pangidaron, ug niini si Estrada naka serbisyo na kapin sa unom ka tuig sa detention samtang gihusay pa ang iyang kasong plunder.
Giklaro ni Bunye nga si Estrada sa iyang paghangyo nga ma pardon misaad nga dili na mokandidato sa bisan unsa nga posisyon ug tungod lagi kay polisiya man sa administrasyon nga buhi-an ang usa ka binilanggo kon mo-abot na sa 70 anyos.
Maoy hinungdan nga subay sa gahum nga gilugway sa konstitusyon ngadto kang presidenti Arroyo, iyang gihatag ang executive clemency ngadto kang Joseph Ejercito Estrada, konbiktado sa Sandiganbayan sa kasong plunder. Gibalik kang Estrada ang iyang katungod sibil ug political.
Tungod kay si presidenti Arroyo mihatag naman sa executive clemency, si Bunye miingon nga si Estrada usa na ka gawasnon nga nilalang ug makagawas na sa iyang resthouse sa Tanay karong udto. (PIA-ZN) [top]
