Ilocano News: Iti agdama, nasayaat ti kasasaad dagiti Pilipino sadiay Pakistan, kuna ti DFA
By Jessie R. Valdez
San Fernando City, La Union (7 November) -- Gapu iti pannaka-ideklara ti lugar a Pakistan nga "state of calamity" ni Press Secretary ken Spokesperson Ignacio Bunye, impakaammo na a dagus ti bilin ni Presidente Gloria Macapagal Arroyo iti Department of Foreign Affairs ken Philippine Embassy sadiay Islamabad nga nakasagana da koma nga kankanayon ket kitaen da a nalaing dagiti pagsayaatan ti tallo ribu a Pilipino nga agnaed sadiay nangnangruna ti proteksion da.
"Dagusen da koman ti agipakat kadagiti adu a linya nga alisto a pakakontakan ken makasao dagiti tattao sadiay ket agaramid pay koma ti embassy kadagiti alisto a wagas a pannakasalaknib dagiti Pilipino inkaso nga adda dakes a mapagteng sadiay Pakistan, kinuna pay ni Sec. Bunye.
Segun kadagiti immuna a report, ni Presidente Pervez Musharraf, sinuspendido na ti Konstitusyon da, inikkat na ti chief justice da ken pinaritan na dagiti media. Ti Pakistan ket adda armas na a nuclear ken addaan 160 a milyon a tattao sadiay.
Numan pay kasta, inreport ti DFA nga iti agdama, nasayaat ti kasasaad dagiti Pilipino sadiay Pakistan ket ti met embassy tayo nabagaan dan dagiti Pilipino -OFWs ken nasuruan dan kadagiti banag nga inda aramiden tapno masalakniban da.
Agtultuloy met ti inaldaw-aldaw nga pannakisasao dagiti opisyales ti embassy sadiay kadagiti Pilipino ken panna-kikoordinar da iti ASEAN inkaso a dakes laeng iti mapagteng sadiay a lugar. Ti ASEAN adda nagtutulagan da nga agtitinnulong dagiti naduma –duma a nasnasyon inkaso adda krisis. (PIA La Union) [top]
