Cebuano News: Pag-asa Mactan mipasidaan sa mga biyahedor og mananagat
by Roberto M. Cabardo
Cebu City (November 26) -- Mipasidaan ang PAG-ASA Mactan sa mga mananagat og mga biyahedor nga ang kadagatan sa silangang bahin sa Kabisay-an, magpadayong baloron tungod sa bagyong Mina nga mikusokuso gihapon sa mga lugar sa Northern Luzon.
Matud ni Claude Alveola, weather forecaster sa PAG-ASA Mactan nga kini tungod usab sa daghang ulan og hangin nga dala sa bagyong Mina. Tungod niini, mihangyo si Alveola sa katawhan og mga biyahedor nga magbantay og sa dili pagbiyahe sa kadagatan kung dili kaayo importante ang lakaw ngadto sa mga isla sa silangang Kabisay-an.
Niingon sab si Alveola nga ang tropical depression nga Lando gipaabot sab nga mosulod pagbalik sa Pilipinas karong adlawa tungod na sab sa paghigop sa bagyong Mina.
Kung mahinumduman, ang tropical depression Lando sorpresang niigo sa Sugbo niadtong Lunes sa gikusgon nga saez cienta y singko hangtud otsenta kilometros matag oras nga niresulta sa pagbaha og pagkatanggong sa daghang mga pasahero ingon man pagkawagatng sa kuryente og tubig.
Sa pagbali ning tropical depression Lando sa nasod, kini gibana-bana moigo sa Palawan og mga isla sa Spratly.
Matud ni Alveola, sa iyang mahinumduman, kini dili unang higayon nga nibalik og igo sa nasod ang usa ka bagyo. Matud niya nahitabo na sab kini sa nangaging tulo ka dekada. (PIA Cebu) [top]
